राज्यभरात चर्चेत असलेल्या आयएएस अधिकारी पूजा खेडकर यांना तसेच त्यांच्या कुटुंबाला दिलेल्या सर्व कागदपत्रांची पडताळणी सुरू असून आज नाशिक विभागीय आयुक्तांना त्याचा अहवाल पाठविणार आहे, अशी माहिती जिल्हाधिकारी सिद्धाराम सालीमठ यांनी पत्रकारांशी बोलताना दिली.
आयएएस अधिकारी पूजा खेडकर यांना नगरच्या जिल्हा रुग्णालयातून दिव्यांग व बहुविकलांग प्रमाणपत्रे देण्यात आली होती. तत्कालीन वैद्यकीय अधिकाऱयांनी दिलेली प्रमाणपत्रे अधिकृत आहेत की नाहीत, याचा अहवाल जिल्हाधिकारी सिद्धाराम सालीमठ यांच्याकडे सुपूर्द केल्याची माहिती जिल्हा शल्यचिकित्सक डॉ. संजय घोगरे यांनी दिली.
पूजा खेडकर व त्यांच्या कुटुंबासंदर्भात वरिष्ठ पातळीवरून गोपनीय माहिती सरकारने मागविली आहे. राज्य सरकारच्या प्रशिक्षण खात्याने ही माहिती एकत्रित देण्याचा आदेश दिल्यानंतर नगर जिल्हा प्रशासनाने कालपासून संबंधित विभागांकडून माहिती मागविण्यास सुरुवात केली आहे. यात इन्कम टॅक्स, महावितरण, प्रांत कार्यालय, ध्वनी प्रदूषण मंडळ आदी विभागांकडून माहिती मागविली आहे. तसेच जिल्हा रुग्णालयातून दिलेल्या प्रमाणपत्रांची माहितीसुद्धा घेण्यात आली आहे.
जिल्हाधिकारी सिद्धाराम सालीमठ म्हणाले, खेडकर कुटुंबाला दिलेल्या कागदपत्रांची माहिती चार विभागांकडून घेत आहोत. आज दुपारपर्यंत या विभागांची माहिती उपलब्ध झाल्यानंतर एकत्रितपणे ही नाशिक विभागीय आयुक्तांना आज सादर केली जातील. मात्र त्यांनी कागदपत्रांबाबत सविस्तर माहिती दिली नाही.
सन 2018मध्ये खेडकर यांना प्रमाणपत्र देणारे तत्कालीन प्रभारी जिल्हा शल्यचिकित्सक बापूसाहेब गाढे, अतिरिक्त जिल्हा शल्यचिकित्सक डॉ. दर्शना धोंडे यांच्यासह सध्याचे जिल्हा शल्यचिकित्सक डॉ. संजय घोगरे यांच्याशी आज जिल्हाधिकारी सालीमठ यांनी चर्चा केली होती.
पूजा खेडकर यांचे गाव भालगाव (ता. पाथर्डी) हे आहे. खेडकर यांना नगरच्या जिल्हा रुग्णालयातून दिव्यांग व बहुविकलांग अशी दोन प्रमाणपत्रे देण्यात आली आहेत. नेत्र दिव्यांग प्रमाणपत्र 25 एप्रिल 2018 रोजी, तर मानसिक (बहुविकलांग) व नेत्र दिव्यांग खेडकर यांना ज्या कालावधीत दिव्यांग प्रमाणपत्रे वितरित करण्यात आली ते 2021 रोजी डोळ्याचे व मानसिक असे दोन्ही मिळून प्रमाणपत्र देण्यात आले व त्याची टक्केवारी 51 टक्के असल्याची माहिती डॉ. संजय घोगरे यांनी दिली. वैद्यकीय मंडळांनी त्याची पडताळणी करून ती प्रमाणपत्रे दिली असल्याचे त्यांनी स्पष्ट केले.
