अर्बन को- ऑपरेटिव्ह बँकेच्या घोटाळा प्रकरणांमध्ये बँकेचे माजी संचालक अजय बोरा यांचा अटकपूर्व जामीन अर्ज आज जिल्हा व सत्र न्यायाधीश एम. एच. शेख यांनी फेटाळून लावला आहे.
नगर अर्बन बँकेमध्ये मोठ्या प्रमाणामध्ये घोटाळा झाला आहे. सध्या बँकेचे लायसन रद्द करण्यात आले आहे. बँकेने कोट्यवधी रुपयांचे जे कर्ज दिले होते, ते अद्यापपर्यंत वसूल झालेले नाही. २९१ कोटी रुपयांचा कर्ज घोटाळ्याचा विषय गाजला आहे. चार पोलीस ठाण्यांत वेगवेगळ्या प्रकारचे गुन्हे दाखल आहेत. प्रारंभी पोलिसांनी नंतर आर्थिक गुन्हे अन्वेषण विभागाने याचा तपास केला आहे.
माजी संचालक अजय बोरा यांनी अटकपूर्व जामिनासाठी न्यायालयात अर्ज दाखल केला होता. त्या अर्जाला फिर्यादी राजेंद्र गांधी यांच्या वतीने ज्येष्ठ विधिज्ञ अभिजीत पुप्पाल यांनी आक्षेप घेतला. बँकेचा गुन्हा गंभीर स्वरूपाचा आहे. या अगोदर ज्या संचालकांचा यामध्ये समावेश होता व त्यांनी न्यायालयामध्ये अर्ज दाखल केला होता, त्यांचे जामीन अर्ज न्यायालयाने फेटाळले आहेत. अजय बोरा हेसुद्धा माजी संचालक आहेत. विशेष म्हणजे २९१ कोटी रुपयांच्या घोटाळा प्रकरणात संचालक मंडळाने गांभीर्याने वसुली केली नाही. त्यामुळे त्यांच्यावर लेखा परीक्षणामध्ये ताशेरे ओढले होते. अजय बोरा बँकेच्या ऑडिट रिकव्हरी कमिटीमध्ये सदस्य होते. त्यांनीसुद्धा गांभीर्याने दखल घेतली नाही. तसेच त्यांनी विरोधही केला नाही, त्यामुळे ही बाब गंभीर आहे. यांच्यामुळे खातेदार व ठेवीदारांचे हाल झाले, याला हेच संचालक मंडळ जबाबदार आहे. त्यामुळे यांचा अटकपूर्व जामीन अर्ज फेटाळून लावावा, असा युक्तिवाद अॅड. पुप्पाल यांनी न्यायालयासमोर केला. न्यायालयाने दोन्ही बाजूंचा युक्तिवाद ऐकल्यानंतर अजय बोरा यांचा जामीन अर्ज फेटाळून लावला.
