नगर जिल्ह्यातील जामखेड तालुक्यातील साकत (हनुमान वस्ती) येथील सूरज महादेव मिसाळ (वय 22) याचे हृदयविकाराच्या झटक्याने शुक्रवारी सायंकाळी निधन झाले. या घटनेने मिसाळ कुटुंबियांना मोठा धक्का बसला आहे. मिसाळ कुटुंबीय तसेच नातेवाईक व मित्रपरिवारावर दु:खाचा डोंगर कोसळला आहे.
सुरज महादेव मिसाळ हा तरुण बीड जिल्ह्यातील पाटोदा येथे मामाबरोबर साईनाथ मेडिकल चालवत होता. काल मेडिकलमधून घरी आल्यावर छातीत दुखू लागल्याने ताबडतोब जामखेड येथील खासगी दवाखान्यात नेले. दाखल करण्यापूर्वीच त्याचे निधन झाले होते. डॉक्टरांनी त्याला मृत घोषित केले.
सुरजचे बावीस दिवसांपूर्वी 2 मे रोजी लग्न झाले होते. सुरजला बरे वाटत नाही म्हणून बीड येथील दवाखान्यात काही दिवस त्याने उपचार घेतले होते. बीडवरून आल्यावर बरे वाटल्याने काल तो मेडिकलमध्ये गेला होता. सायंकाळी घरी आल्यावर छातीत दुखू लागल्याने जामखेड येथील एका खासगी दवाखान्यात त्याला उपचारासाठी नेण्यात आले. पण त्यापूर्वीच त्याचे निधन झाले होते. आज सकाळी सात वाजता हनुमान वस्ती येथे अंत्यसंस्कार करण्यात आले. सुरजच्या अचानक जाण्याने परिसरात शोककळा पसरली आहे. सुरजच्या पाठीमागे आई, वडील, पत्नी, एक भाऊ व बहिण असा परिवार आहे.
