मैसूरमध्ये नुकतीच एक धक्कादायक घटना घडली आहे. आज 17 नोव्हेंबर रोजी सकाळी सोमेश्वर उचिला येथील खासगी बीच रिसॉर्टच्या स्विमिंग पूलमध्ये तीन तरुणींचा बुडून मृत्यू झाला. या तिघीही मैसूर येथील रहिवासी आहेत.
तरुणी 16 नोव्हेंबर रोजी रिसॉर्टला गेल्या होत्या आणि 2 नंबर रुममध्ये थांबल्या होत्या. रविवारी सकाळी साधारण 10च्या सुमारास त्या स्विमिंगपूलमध्ये खेळता खेळता त्यातली एक जण बुडायला लागली. तिला वाचविण्याच्या प्रयत्नात दुसरी बुडाली आणि त्यानंतर तिसरीही बुडाली. हा संपूर्ण प्रकार हॉटेलच्या सीसीटिव्ही कॅमेऱ्यात कैद झाला .
मिळालेल्या माहितीनुसार, कुरुबरहल्ली फोर्थ क्रॉस येथील निशिता एम.डी. (21), रामानुजा रोडच्या के.आर. परिसरातील पार्वती एस. (20) आणि विजयनगर येथील देवराज परिसरातील कीर्तना एन. (21) अशी त्यांची नावे आहेत. या तरुणींनी पूलाशेजारी कपडे ठेवले होते आणि पाण्यात उतरण्यापूर्वी त्यांची रेकॉर्डींग करण्यासाठी त्यांनी आयफोनमध्ये कॅमेरा सेट केला होता. या तिघींनाही पोहता येत नव्हते.रिसॉर्टच्या कर्मचाऱ्यांना ही घटना कळली. तलावात धडपडणाऱ्या मुली सीसीटीव्ही फुटेजमध्ये कैद झाल्या आहेत. याप्रकरणी उल्लालचे पोलिस निरीक्षक एच.एन. बालकृष्ण यांच्या नेतृत्वाखालील पथकाने घटनास्थळी भेट दिली. सध्या पोलीस या संपूर्ण प्रकरणाचा तपास करत आहेत. त्यानंतर पुढील कारवाई केली जाईल.
