मुंबईत वाढलेले प्रदूषण रोखण्यासाठी पालिकेने मोठ्या प्रमाणात वृक्ष लागवड सुरू केली असून 2018 पासून आतापर्यंत तब्बल 5 लाख 81 हजार 589 झाडे लावली आहेत. तर आता ‘तुम्ही फक्त जागा द्या, आम्ही झाडे लावतो’ असे आवाहन पालिकेच्या उद्यान विभागाकडून सोसायट्यांना करण्यात आले आहे.
मुंबईत गेल्या काही वर्षांपासून वाढलेले प्रदूषण रोखण्यासाठी पालिकेच्या माध्यमातून अनेक उपाययोजना करण्यात येत आहे. यामध्ये सर्वाधिक प्रभावी वृक्ष लागवड ठरणार असल्याने उद्यान विभागाकडून आतापर्यंत 68 ठिकाणी झपाटय़ाने वाढणारी मियावाकी वने विकसित करण्यास सुरुवात केली आहे. आगामी काळात हे प्रमाण वाढवण्यात येणार असून वनांसाठी पाच ते सहा ठिकाणी जागाही निश्चित करण्यात आल्या आहेत. काही ठिकाणी मियावाकी वने आणि झपाटय़ाने वाढणाऱया देशी झाडांची लागवडही करण्यात येणार असल्याचे मुंबई महानगरपालिकेचे उद्यान अधीक्षक तथा वृक्ष अधिकारी जितेंद्र परदेशी यांनी दैनिक ‘सामना’शी बोलताना सांगितले.
असा आहे उपक्रम
मुंबईमधील सोसायट्यांनी जागा उपलब्ध करून दिल्यास पालिकेच्या उद्यान विभागाकडून त्या ठिकाणी झाडांची मोफत लागवड करण्यात येईल. यासाठी आवश्यक मनुष्यबळही पालिकेचे असेल. झाडेही मोफत असतील. झाडे लावल्यानंतर फक्त संबंधित सोसायट्यांना झाडांची काळजी घ्यावी लागणार आहे. यासाठी आवश्यक मार्गदर्शनही करण्यात येईल.
मियावाकी वनांचा असा होतो फायदा
मियावाकी वने कमी जागेत आणि कमी वेळेत वाढणारी असून कोकणातील ‘देवराई’शी आणि सिंगापूरसारख्या शहरांमध्ये असणाऱया अर्बन फॉरेस्ट संकल्पनेवर आधारित आहे. या वनांमधील झाडांमध्ये कमी अंतर असल्याने ती घनदाट असतात. मुंबईसारख्या कमी मोकळय़ा जागा उपलब्ध असलेल्या ठिकाणी ही वने लवकर वाढत असल्याने फायदेशीर ठरतात.
मियावाकीमध्ये ही झाडे लावली जातात
मियावाकी वनांमध्ये चिंच, पळस, करंज, बेहडा, सावर, रतनगुंज, साग, सीताफळ, बेल, पारिजातक, कडूनिंब, बांबू, पेरू, पुत्रजिवा, सीता अशोक, हरडा, खैर, जांभूळ, मोह, बहावा, सुरु, बदाम, रिठा, शिसम, बकुळ, अर्जुन, फणस, आवळा, कदंब, कढीपत्ता, नारळ, बकुळ, आंबा, निलगिरी यासह फुलझाडे-फळझाडे लावण्यात येत आहेत. विशेष म्हणजे मियावाकी वनांची संकल्पना जपानी पद्धतीची असली तरी मुंबईत लागवड करण्यात येणारी झाडे ही देशी प्रजातीची आहेत.
