प्रभादेवी येथील प्रसिद्ध ‘सारंग बंधू वडापाव’चे सर्वेसर्वा सुभाष सारंग यांचे आज दुपारी अल्पशा आजाराने निधन झाले. ते 67 वर्षांचे होते. त्यांच्या पश्चात पत्नी स्वप्ना, मुलगा सूरज, मुलगी धनश्री असा परिवार आहे.
कट्टर शिवसैनिक आणि मराठी उद्योजक अशी ओळख असलेले सुभाष सारंग हे मूळचे वेंगुर्ला तालुक्यातील पाटपरूळे गावचे. सुरुवातीच्या काळात त्यांनी मुंबईत मिल कामगार म्हणून काम केले. मराठी माणसाने नोकरीऐवजी उद्योगधंद्यात उतरावे या हिंदुहृदयसम्राट शिवसेनाप्रमुख बाळासाहेब ठाकरे यांच्या विचाराने प्रेरित होऊन त्यांनी प्रभादेवी येथे सारंग बंधू या नावाने वडापावचा छोटासा स्टॉल सुरू केला. पुढे त्यांनी हॉटेल व्यवसायात चांगली प्रगती केली. दादरसह प्रभादेवी, वरळी परिसरात सारंग बंधू यांचा वडापाव आणि कांदा भजी म्हणजे खवय्यांचा जीव की प्राण. अनेक राजकीय नेतेदेखील आवर्जून त्यांच्या कांदा भजीचा आस्वाद घ्यायला येथे यायचे.
मध्य प्रभादेवी सार्वजनिक गणेशोत्सव मंडळाचे अध्यक्ष, प्रभादेवी पालिका शाळा पालक संघटनेचे अध्यक्ष, यंग प्रभादेवी क्रीडा मंडळाचे अध्यक्ष म्हणूनदेखील त्यांनी काम पाहिले होते. दरम्यान, सुभाष सारंग यांच्या इच्छेनुसार त्यांच्या पार्थिवाचे देहदान करण्यात आले आहे. तत्पूर्वी आज सायंकाळी त्यांचे पार्थिव प्रभादेवी येथील त्यांच्या हॉटेलजवळ अंत्यदर्शनासाठी ठेवण्यात आले होते. शिवसेना विभागप्रमुख, आमदार महेश सावंत, शिवसेना उपनेत्या, माजी महापौर विशाखा राऊत, शाखाप्रमुख संजय भगत यांच्यासह विविध राजकीय पक्षांचे कार्यकर्ते आणि स्थानिक नागरिकांनी त्यांच्या अंत्यदर्शनासाठी गर्दी केली.
