आंतरराष्ट्रीय सहकार वर्षाच्या निमित्ताने सहकारी पतसंस्थांच्या कार्याला बळकटी देण्यासाठी महाराष्ट्र राज्य पतसंस्था फेडरेशनच्यावतीने आयोजित सहकार दिंडीचे स्वागत आज महाराष्ट्र राज्य सहकारी बँकेत अत्यंत उत्साहाने करण्यात आले. यावेळी सहकारासंबंधीच्या पुस्तकरुपी दिंडीचे राज्य बँकेत मंत्रोच्चाराने पूजन करण्यात आले.
सहकार दिंडीनिमित्त दिंडीतील सहकारी कार्यकर्त्यांना सहकाराची शपथ देण्यात आली. यावेळी सहकाराच्या सक्षमीकरणासाठी चालू असलेल्या आंदोलनास मदत म्हणून राज्य सहकारी बँकेतर्फे, बँकेचे प्रशासक विद्याधर अनास्कर यांचे हस्ते पतसंस्था फेडरेशनचे अध्यक्ष काका कोयटे यांना दहा लाख रुपयांचा धनादेश सुपूर्द करण्यात आला. या सहकार दिंडीचा समारोप 8 फेब्रुवारी रोजी शिर्डी येथे पतसंस्था फेडरेशनतर्फे आयोजित करण्यात आलेल्या सहकार परिषदेत होणार आहे, अशी माहिती व्यवस्थापकीय संचालक दिलीप दिघे यांनी दिली.
