बोरिवलीतील मागाठाणे बस आगारातून बोरिवली स्थानकाच्या पूर्वेला जाणाऱ्या बेस्ट बसने दुपारी राजेंद्रनगर परिसरात एका तीन वर्षांच्या मुलीला चिरडले. मेहक खातून शेख (3) असे या मुलीचे नाव असून बसचे चाक तिच्या डोक्यावरून गेल्याने तिचा जागीच मृत्यू झाला. याप्रकरणी बसचालकावर गुन्हा दाखल करून त्याला अटक करण्यात आली आहे.
बेस्ट उपक्रमाच्या ताफ्यातील भाडेतत्त्वावरील डागा ग्रुपची बस नंबर 7491 (एमएच03 -सीव्ही-7424) मार्ग क्रमांक ए-301 ही बस आज दुपारी 12.40 वाजण्याच्या सुमाराला मागाठाणे बस आगारातून बोरिवली पूर्व स्थानक येथे जाण्यासाठी निघाली. विनावाहक ही बस मागाठाणे बस आगारातून निघाली आणि बोरिवली पूर्वेकडील राजेंद्रनगर येथे आली. त्यावेळी मेहक आणि तिचा लहान भाऊ रस्ता ओलांडत होते. मेहक ही बसच्या पुढील चाकाच्या खाली आली. पोलिसांनी तिला तातडीने कांदिवली येथील शताब्दी रुग्णालयात उपचारासाठी दाखल केले, मात्र उपचाराआधीच तिचा मृत्यू झाल्याचे रुग्णालयातील डॉक्टरांनी स्पष्ट केले. दरम्यान, बसचालक प्रकाश दिगंबर कांबळे (48) यांच्यावर गुन्हा दाखल करून त्याला रात्री उशिरा अटक करण्यात आल्याचे पोलिसांनी सांगितले.
