मुंबई पालिकेच्या कर निर्धारण व संकलन खात्याच्या सर्व्हरमध्ये येत असणाऱ्या अडचणी दूर झाल्या असून मालमत्ता कर भरण्याची प्रक्रिया सुरळीत झाल्याची माहिती प्रशासनाने दिली. नागरिकांनी मालमत्ता कर भरणा करण्यासाठी प्रथम स्वतःच्या मोबाईलवर उपलब्ध असलेल्या Gpay – UPI सुविधेचा वापर करावा, असे आवाहन पालिकेने केले. पालिकेने 2024-25 या आर्थिक वर्षासाठी मालमत्ताकराची सुमारे सवा सहा लाख देयके निर्गमित केली आहेत. पालिकेच्या https://www.mcgm.gov.in या संकेतस्थळावर मालमत्ताकर देयके नागरिकांसाठी उपलब्ध आहेत. कर निर्धारण व संकलन खात्याने मालमत्ता करप्रणालीचे सर्व्हर्स नवीन क्लाऊडवर स्थलांतरीत केले आहेत. तथापि, मालमत्ताकर ऑनलाइन भरण्याच्या प्रक्रियेत वन टाइम पासवर्ड (ओटीपी) मिळणेकामी किरकोळ अडचणी येत असल्याचे निदर्शनास आले आहे. ही बाब विचारात घेऊन करनिर्धारण व संकलन खात्याकडून प्रणालीस्तरावरील त्रुटी दूर करण्यात आल्या आहेत. सद्यस्थितीत मालमत्ता कर ‘ऑनलाइन’ भरण्याची प्रक्रिया सुरळीत करण्यात आली आहे.
