मुंबईतील उद्यान, मैदान, मनोरंजन मैदानाच्या देखभालीसाठी गेल्या महिन्यात मुंबई महापालिकेने झोन स्तरावर काढलेली निविदा आज अखेर रद्द करण्यात आली. मात्र, वॉर्ड स्तरावरील निविदा कायम ठेवण्यात आली आहे. रद्द करण्यात आलेल्या झोनस्तरीय निविदेचा समावेश आता वॉर्डस्तरावरील निविदेत केला जाणार आहे. दरम्यान, झोन आणि वॉर्डस्तरावर कंत्राटे ही पालिकेच्या अधिकाऱ्यांशी संगनमत करून मिळवली आहेत. त्यात कोट्यवधींचा भ्रष्टाचार केला आहे, असा आरोप सामाजिक कार्यकर्ते अॅड. सागर देवरे यांनी केला होता.
मुंबई महापालिकेने उद्यान, मैदान, मनोरंजन मैदानाच्या देखभालीसाठी ऑक्टोबरमध्ये 200 कोटींच्या निविदा काढल्या होत्या. त्या खुल्या करून त्यानुसार त्यांना कामे देण्यात आली, मात्र 24 वॉर्डसाठी स्वतंत्र निविदा मागवल्या असताना 1, 3 आणि 5 या झोनमध्ये परिमंडळनिहाय 12 आणि वॉर्ड स्तरावर 12 ठिकाणी निविदा मागवण्यात आल्या. एकाच कामासाठी दोन पद्धतीने निविदा मागवण्याची पद्धत ही संशय निर्माण करणारी आहे. त्यामुळे यात उद्यान विभागाच्या संबंधित अधिकाऱयांची चौकशी करावी, अशी मागणी देवरे यांनी पालिका आयुक्तांकडे केली होती.
जास्त दरामुळे निविदा रद्द
झोनस्तरावरील निविदांमध्ये कंत्राटदारांनी दिलेले दर हे जास्त होते. त्या तुलनेत वॉर्डस्तरावर असलेल्या निविदांमधील दर हे माफक आहेत. त्यामुळे पालिकेचे नुकसान टाळण्यासाठी अखेर झोनस्तरावरील निविदा रद्द करण्यात आल्या, अशी माहिती महापालिकेच्या एका वरिष्ठ अधिकाऱयाने दिली.
सिंडिकेट करून कंत्राटे मिळवल्याचा आरोप
परिमंडळनिहाय (झोन स्तरावर) 12 आणि 12 वॉर्डसाठी काढण्यात आलेल्या निविदांमध्ये केवळ पाच कंपन्यांनी भाग घेतला. यात डीबी इन्फ्राटेक, हिरावती इंटरप्राईज यासह पाच कंपन्यांचा समावेश होता. या कंपन्यांनी एकमेकांशी संगनमत करून दोन वेगवेगळे दरपत्रक देऊन त्यानुसार कंत्राटे आपापसात वाटून घेतली. म्हणजे एका ठिकाणी एका कंपनीने जाणूनबुजून दर कमी ठेवले तर त्याच निविदेत दुसऱया कंपनीने दर जास्त ठेवले. असे इतर निविदांमध्ये करून ही पंत्राटे एकमेकांना कशी मिळतील याची व्यवस्था केली. त्यामुळे या पाच कंपन्यांनी सिंडिकेट करून ही पंत्राटे मिळवली, असा आरोप देवरे यांनी केला होता.
