वरळी येथे अपघात झाल्यानंतर कावेरी नाखवा (44) यांना कारने तब्बल दीड किमीपर्यंत फरफटत नेले होते. त्यानंतर मिहीर आणि बिडावतने जागेची अदलाबदल करून तेथून पळ काढला होता. कलानगर येथे बिडावत सापडला, पण अपघात करणारा मिहीर अद्याप पोलिसांच्या हाती लागलेला नाही. दरम्यान, या प्रकरणात अटक झालेल्या मिंधे गटाचा उपनेता व मिहीरचा बाप राजेश शहा याला न्यायालयात जामीन मंजूर झाला तर चालक बिडावतला एक दिवसाची कोठडी सुनावली आहे.
रविवारी पहाटे साडेपाच वाजण्याच्या सुमारास वरळी कोळीवाडय़ात राहणारे कावेरी व प्रदीप नाखवा हे दाम्पत्य मासे घेऊन वरळीच्या दिशेने निघाले होते. ते वरळी येथील सीजे हाऊसनजीक आले असता मागून भरधाव आलेल्या बीएमडब्लू कारने त्यांच्या दुचाकीला जोरदार धडक दिली. यामुळे दुचाकीवरील प्रदीप आणि कावेरी हे दाम्पत्य कारच्या बोनेटवर पडले. त्यावेळी कारला ब्रेक मारल्याने प्रदीप कसेबसे तेथून बाजूला फेकले गेले, पण कावेरी यांच्या साडीचा पदर डाव्या बाजूच्या चाकात गुंतला गेला. एवढे होऊनही मिहीरने कार न थांबवता दीड किलोमीटरपर्यंत कावेरी यांना फरफटत नेले. त्यानंतर एके ठिकाणी कार थांबवून दोघे बाहेर आले आणि चाक व बंपरमध्ये अडकलेल्या कावेरी यांना काढून तेथेच ठेवले आणि दोघेही सुसाट पळून गेले. दरम्यान, या घटनेची माहिती मिळाल्यानंतर वरळी पोलिसांनी तपास सुरू केला. तपासात काही बाबींच्या आधारे मिहीर शहाचा बाप आणि मिंधे गटाचा नेता राजेश शहा तसेच चालक राजऋषी बिडावत अशा दोघांना पोलिसांनी अटक केली, मिहीर मात्र अद्याप पोलिसांच्या हाती लागलेला नाही. राजेश आणि बिडावत यांना वरळी पोलिसांनी आज शिवडी येथील महानगर दंडाधिकारी न्यायालयात हजर केले. यावेळी सरकारी वकील भारती भोसले यांनी युक्तिवाद केला. न्यायालयाने युक्तिवाद ऐकल्यानंतर राजेश शहाला जामीन मंजूर केला तर बिडावतला एक दिवसाची पोलीस कोठडी सुनावली.
मिहीर राज्याबाहेर सटकल्याची शक्यता
अपघात झाल्यानंतर कारमध्ये उपस्थित असलेला चालक राजऋषी बिडावत हा पोलिसांच्या हाती लागला, पण पार्टी करून अपघात करणारा व एका महिलेच्या मृत्यूस जबाबदार असलेला मिहीर मात्र पोलिसांना दोन दिवस उलटले तरी सापडलेला नाही. तो राज्याबाहेर पळून गेला असण्याची शक्यता पोलिसांकडून वर्तविण्यात येत आहे. पण तो देशाबाहेर पळून जाऊ नये याकरिता वरळी पोलिसांनी त्याच्या विरोधात लूक आऊट नोटीस जारी केली आहे. गुन्हे शाखेची पथकेदेखील मिहीरचा शोध घेत आहेत.
तू पळ, बिडावत तू जबाबदारी घे…
अपघात झाल्यानंतर कावेरी यांना कारने दीड किलोमीटर फरफटत नेले. पुढे जाऊन मिहीरने एकेठिकाणी कार थांबवली. दोघांनी जागेची अदलाबदल केली. मिहीर शेजारच्या सीटवर तर बिडावत स्टेअरिंग सीटवर येऊन बसला. त्यानंतर बिडावतच्या मोबाईलवरून मिहीरने राजेश शहाला कॉल केला आणि घडला प्रकार सांगितला. तेव्हा तू पळून जा असे राजेशने मिहीरला सांगितले, तर अपघाताची जबाबदारी तू घे असे राजेशने बिडावतला सांगितल्याचे पोलीस तपासात समोर आले आहे.
