विमान हवेत असताना एका माथेफिरू प्रवाशाने आपत्कालीन दरवाजा उघडण्याचा प्रयत्न केला. विमानातील क्रू मेंबर आणि इतर प्रवाशांच्या सतर्कतेमुळे पुढील अनर्थ टळला. ही घटना कॅमेऱ्यात कैद झाली आहे. या घटनेचा व्हिडिओ सोशल मीडियावर व्हायरल झाला आहे. दक्षिण अमेरिकेत ही घटना घडली. विमानाने लँडिंग केल्यानंतर सदर प्रवाशाला विमानतळ पोलिसांच्या स्वाधीन करण्यात आले.
न्यूयॉर्क पोस्टने दिलेल्या वृत्तानुसार, कोपा एअरलाइन्सच्या विमानात मंगळवारी सकाळी ही घटना घडली. विमानाने ब्राझीलमधील ब्रासिलिया येथून पनामा सिटीकडे उड्डाण केले होते. विमान लँड होण्याच्या मार्गावर असतानाच एक माथेफिरू प्रवाशी विमानाचा आपत्कालीन दरवाजा उघडण्याचा प्रयत्न करू लागला. यावेळी विमानातील एका क्रू मेंबरने पाहिले आणि त्याने आरडाओरडा केला. त्याच्या आवाजाने दुसरा क्रू मेंबर धावत आला आणि त्याने प्रवाशाला पकडण्याचा प्रयत्न केला. मात्र त्याला एकट्याला प्रवाशाला आवरणे कठिण झाले.
विमानातील इतर प्रवाशी तात्काळ क्रू मेंबरच्या मदतीला धावले आणि त्यांनी माथेफिरूला पकडून मारहाण केली. विमान लँड होईपर्यंत प्रवाशांनी माथेफिरूला पकडून ठेवले. विमान पनामा सिटीत लँड होताच माथेफिरूला पोलिसांच्या स्वाधीन करण्यात आले. क्रू मेंबरच्या सतर्कतेमुळे पुढील अनर्थ टळला आणि प्रवाशांचे प्राण वाचले.
