मुंबई शहर व उपनगरांत ‘पहाटे गारवा आणि दिवसा लाहीलाही’ अशी परिस्थिती शुक्रवारी होती. गेल्या काही दिवसांत सरासरीपेक्षा जास्त राहिलेल्या पहाटेच्या तापमानात शुक्रवारी 16 अंशांपर्यंत घट झाली, तर कमाल तापमान तब्बल 6 अंशांनी वाढले. सांताक्रुझमध्ये 36 अंश इतके कमाल तापमान नोंद झाले. त्यामुळे पहाटे गारवा अनुभवणारे मुंबईकर दिवसभर उकाडय़ाने हैराण झाले. डिसेंबरच्या शेवटच्या आठवडय़ात थंडीची तीव्रता वाढली होती, मात्र नवीन वर्ष उजाडताच उकाडय़ात वाढ झाली. मागील तीन दिवस शहरातील कमाल तापमान 34-35 अंशांच्या घरात होते. शुक्रवारी कमाल तापमानाची पातळी सरासरीपेक्षा 6 अंशांनी वाढली. मात्र किमान तापमानात 4 अंशांची घट नोंद झाली. हवामान खात्याच्या अंदाजानुसार, शहरात पुढील आठवडाभर किमान तापमान 20 अंशांपेक्षा कमी नोंद होणार आहे, तर आणखी दोन दिवस कमाल तापमान 34 अंशांपुढे राहील. यानुसार दोन दिवसांच्या उकाडय़ानंतर शहरात पुन्हा थंडीची तीव्रता वाढण्याची चिन्हे आहेत.
