छत्रपती संभाजीनगर जिल्ह्यातील रिल्सच्या नादात कार दरीत कोसळून तरुणी मयत झाल्याची घटना ताजी असतानाच बीडमध्येही रिल्सच्या नादात एकाचा जीव गेला आहे. जालन्याहून तुळजापूरला निघालेल्या दोन मित्रांनी धावत्या दुचाकीवर रिल्स बनवली. यावेळी दुचाकीस्वाराचे नियंत्रण सुटल्याने दुचाकी कठड्याला धडकून अपघात झाला. यात मागे बसलेला एक जण जागीच ठार झाला. तर दुसरा गंभीर जखमी असून, त्याच्या दोन्ही पायांचा चुराडा झाला आहे. ही घटना शुक्रवारी दुपारच्या वेळी बीड बायपासवर घडली. हे दोन्ही मित्र जालना येथील रहिवासी आहेत.
जालना तालुक्यातील गणेशपूर येथील अनिरुद्ध कळकुंबे (वय – 25) असे मयताचे नाव आहे. तर मधू शेळके हा जखमी आहे, दोघेही शक्रवारी सकाळीच दुचाकीवरून (एम.एच. 21 एम. 1154) बीडमार्गे तुळजापूरला जात होते. मधू हा दुचाकी चालवत बायपासवर आल्यावर दुचाकीवर असतानाच अनिरुद्ध याने आपल्या मोबाईल रिल्स बनवण्यासाठी व्हिडिओ तयार करू लागला. यावेळी दुचाकीस्वार मधूचे लक्ष विचलीत झाले असून, बाजूच्या कठड्यावर जाऊन दुचाकी आदळली. यामध्ये अनिरुद्धचा जागीच मृत्यू झाला. तर मधूच्या दोन्ही पायांचा चुराडा झाला.
हा सर्व प्रकार व्हिडिओमध्ये कैद झाला असून, तो सोशल मीडियावरही व्हायरल झाला आहे. या दोघांनाही जिल्हा रुग्णालयात दाखल केले होते. जखमीला छत्रपती संभाजीनगर येथे हलवण्यात आले होते. याप्रकरणाची शनिवारी दुपारपर्यंत बीड ग्रामीण पोलीस ठाण्यात नोंद झाली नव्हती.
View this post on Instagram
