सोनी मराठीवरील ‘महाराष्ट्राची हास्यजत्रा’ या कार्यक्रमातील विनोदवीरांनी त्यांच्या विनोदी शैलीने प्रेक्षकांना खळखळून हसवले. परंतु गेल्या काही महिन्यांपासून या शोने ब्रेक घेतला होता. हा शो पुन्हा कधी सुरू होईल याची प्रेक्षक आतुरतेने वाट पाहत होते. दरम्यान, वुई आर बॅक असे म्हणत सूत्रसंचालक प्राजक्ता माळी हिने नव्या सीझनच्या शुटिंगला सुरुवात झाल्याची माहिती चाहत्यांना दिली आहे. तिने शेअर केलेल्या व्हिडीओमध्ये हास्यजत्रेतील कलाकार तसेच शोमध्ये असणारे प्रसाद ओक आणि सई ताम्हणकर दिसत आहेत. येत्या 2 डिसेंबरपासून ‘महाराष्ट्राची हास्यजत्रा’ पुन्हा प्रेक्षकांच्या भेटीला येत आहे. हा कार्यक्रम आता आठवडय़ातील तीन दिवस प्रेक्षकांना पाहता येणार आहे.
