लाडक्या बहिणींना दीड हजार रुपये महायुती सरकार देत आहे. पण दुसऱ्या बाजूला चिमुकल्यांच्या तोंडचा घास काढून घेत आहे. महायुती सरकारने माध्यान्ह भोजन योजनेबाबत मोठा निर्णय घेतला आहे. माध्यान्ह भोजनात चिमुकल्यांना देण्यात येणारी अंडी आणि गोड पदार्थ वगळण्यात आले आहेत. राज्य सरकारने अंडी आणि गोड पदार्थांसाठी दिला जाणारा निधी बंद करण्याचा निर्णय घेतला आहे. सरकारने मंगळवारी तसा अध्यादेश जारी केला आहे.
संबंधित शाळा व्यवस्थापन लोकसहभागातून आवश्यक निधी उभारून विद्यार्थ्यांना अंडी, तांदळाची खीर आणि नाचणी सत्व यासारखे पदार्थ देऊ शकतात, असे सरकारने आदेशात नमूद केले आहे. राज्यातील 24 लाख विद्यार्थ्यांना आठवड्यातून एकदा अंडी दिली जात होती. यासाठी वर्षाला राज्य सरकारकडून 50 कोटींचा निधी दिला जात होता.
मुलांमधील प्रथिनांची कमतरता दूर करण्यासाठी दर आठवड्याला एक अंडे देण्याची योजना राज्य सरकारने नोव्हेंबर 2023 मध्ये सुरू केली होती. मात्र, काही संघटनांच्या विरोधानंतर सरकारने ही योजना बदलली आहे. आता शाळांना देणग्या गोळ्या करून विद्यार्थ्यांसाठी अंडी आणि गोड पदार्थांची व्यवस्था करावी लागणार आहे.
लाडकी बहीण योजनेच्या जाहिरातींवर राज्य सरकारने 200 कोटींचा खर्च केला. पण आता चिमुकल्या विद्यार्थ्यांना आवश्यक असलेलं पोषक अन्न देण्यास सरकार हात आखडता घेत आहे, अशी प्रतिक्रिया ठाणे जिल्ह्यातील शालेय व्यवस्थापन समितीचे सदस्य शैलेश घरत यांनी दिली.
