गोरेगाव, बोरिवली, मालाड, अंधेरी, वांद्रे, विलेपार्ले, चेंबूर आणि कुर्ला या भागात बनावट नकाशांच्या आधारे सीआरझेड (कोस्टल रेग्युलेशन झोन) आणि एनडीझेड (नॅचरल डिफेन्स झोन) क्षेत्रांमध्ये अनधिकृतपणे बांधकाम प्रकरणी भूमी अभिलेख कार्यालयातील दोन अधिकाऱ्यांना निलंबित करण्यात आले आहे, अशी माहिती महसूलमंत्री चंद्रशेखर बावनकुळे यांनी विधान परिषदेत दिली.
मुंबईतील बेकायदेशीर बांधकामांबाबत विक्रांत पाटील यांनी तारांकित प्रश्न उपस्थित केला. प्रवीण दरेकर, भाई जगताप, अनिल परब यांनी मुंबईत सुरू असलेल्या बेकायदा बांधकामांची माहिती देत कठोर कारवाईची मागणी केली. महानगरपालिकेच्या उपआयुक्त परिमंडळ कार्यालय 7, 5, 4 आणि 3 मध्ये प्रकारे बनावट नकाशे तयार केल्याची बाब उघडकीला आली. याप्रकरणी कठोर कारवाई केली जात असून उपअधीक्षक भूमी अभिलेख कार्यालयातील शंभूराज बाभळे आणि मीना पांढरे या दोन अधिकाऱ्यांना निलंबित केल्याची माहिती महसूल मंत्र्यांनी दिली.
विशेष पथक करणार चौकशी
मुंबई उच्च न्यायालयाने याप्रकरणी विशेष तपास पथकाची नियुक्ती केली असून त्यामार्फत चौकशी सुरू आहे. एकूण 102 बनावट नकाशांच्या आधारे या संपूर्ण क्षेत्रामध्ये 320 मिळकतींमध्ये अनधिकृत बांधकामे केली आहेत. त्यातील 20 ते 22 मिळकतधारकांनी दिवाणी न्यायालयातून कारवाईला स्थगिती मिळवली असे त्यांनी सांगितले.
