पूर्ववैमनस्य व टोळीयुद्धातून खुनाच्या घटनेपाठोपाठ सोशल मीडियावरील रिल्समधून खुन्नस देऊन खून करण्याच्या घटना घडत आहेत. त्यातच पुन्हा एकदा पूर्ववैमनस्यातून भरदिवसा दगडाने ठेचून तरुणाचा खून केल्याच्या घटनेने कोल्हापूर हादरले आहे.
गजबजलेल्या राजारामपुरी परिसरात दिवसाढवळ्या तरुणाचा दगडाने ठेचून खून केल्याची घटना समोर आली आहे. पंकज निवास भोसले (वय 30, रा. कनाननगर, जिल्हाधिकारी कार्यालयामागे) असे खून झालेल्या तरुणाचे नाव आहे. यातील दोघा हल्लेखोरांना राजारामपुरी पोलिसांनी ताब्यात घेतले असून, अन्य दोघांच्या शोधासाठी पथके रवाना करण्यात आली आहेत. राजारामपुरी पोलीस ठाण्यात रात्री उशिरापर्यंत गुन्हा दाखल करण्यात येत होता.
पोलिसांनी दिलेल्या माहितीनुसार, शहरात अनेक ठाण्यांमध्ये गंभीर गुन्हे दाखल असलेल्या पंकज भोसले याचा गणेश विक्रम काटे आणि नीलेश विक्रम काटे या दोन्ही भावांशी पूर्ववैमनस्यातून वाद झाला होता. या वादातूनच राजारामपुरी 13 वी गल्लीतील एका गॅस एजन्सीजवळ काटे बंधू, अमित गायकवाड आणि त्याचा साथीदार अशा चौघांनी पंकज भोसले याला गाठून त्याच्याशी वाद घातला. वादाचे पर्यवसान हाणामारीत झाले. यावेळी दगडाने ठेचून या चौघांनी पंकजचा खून केला.
शहरात आणखी एक खून झाल्याची बातमी वाऱ्यासारखी पसरताच राजारामपुरी पोलिसांनी घटनास्थळी जाऊन पंचनामा केला. भोसले याचा मृतदेह शवविच्छेदनासाठी सीपीआर रुग्णालयात पाठवण्यात आला. यावेळी शहर पोलीस उपअधीक्षक अजित टिके, राजारामपुरी ठाण्याचे निरीक्षक अनिल तनपुरे यांच्यासह अधिकारी उपस्थित होते.
