एक्सप्रेसवेवरील टोल टाळण्यासाठी चालकाने गाडीचा वेग कमी केला. मात्र टोल वाचवण्याच्या नादात चौघांचा जीव गेला. मागून येणाऱ्या भरधाव बसने कारला धडक दिल्याने एकाच कुटुंबातील चौघांचा मृत्यू झाला. बंगळुरू-म्हैसूर एक्सप्रेसवेवर गुरुवारी ही घटना घडली. याप्रकरणी मंड्या ग्रामीण पोलीस ठाण्यात गुन्हा दाखल करण्यात आला आहे.
कर्नाटकातील मंड्या जिल्हा परिसरात ही घटना घडली. कारमधील कुटुंबीय पिरियापट्टणाला चालले होते. बंगळुरू-म्हैसूर एक्सप्रेसवेवरील टोल टाळण्यासाठी कार चालकाने तुबिनाकेरे एक्झिटजवळ गाडीचा वेग कमी केला होता. याचवेळी मागून येणाऱ्या राज्य परिवहनच्या बसने कारला मागून धडक दिली.
या अपघातात एकाचा जागीच मृत्यू झाला तर अन्य तिघांचा रुग्णालयात उपचारादरम्यान मृत्यू झाला. अपघाताची माहिती मिळताच मंड्या पोलिसांनी घटनास्थळी धाव घेत मदतकार्य सुरू केले.
