बीड येथील ज्ञानधारा मल्टिस्टेट को-ऑप. क्रेडिट सोसायटीमध्ये कर्जत-जामखेड मतदारसंघातील सर्वसामान्य खातेदारांचे 90 कोटी रुपये अडकले असून, खातेदारांचे हक्काचे पैसे परत देण्यात यावेत तसेच या संस्थेसह जनतेची फसवणूक करणाऱया संस्थांची चौकशी करून कडक कारवाई करावी, अशी मागणी आमदार रोहित पवार यांनी राज्यपाल सी. पी. राधाकृष्णन यांच्याकडे केली.
बीडमधील ज्ञानधारा मल्टिस्टेट को-ऑप. क्रेडिट सोसायटीमध्ये कर्जत-जामखेड मतदारसंघातील सुमारे साडेसहा हजारांहून अधिक सभासद असून, त्यांच्या सुमारे 90 कोटी रुपयांच्या ठेवी आहेत. हे सर्व खातेदार शेतकरी, कामगार व सामान्य कुटुंबातील आहेत. या सर्व खातेदारांनी आपली आयुष्याची पुंजी साठवून त्या संस्थेमध्ये दिली होती. काहींनी मुलाच्या शिक्षणासाठी, मुलीच्या लग्नासाठी, तर काहींनी आपल्या आरोग्यासाठी पैसे साठवून ठेवले होते. परंतु या संस्थेने हे पैसे इतरत्र वळवल्याने सर्वसामान्य खातेदारांना हक्काचे पैसे मिळत नसल्याने ते अडचणीत आले आहेत. या सर्व ठेवीदारांनी आमदार रोहित पवार यांची भेट घेऊन यात लक्ष घालण्याची मागणी केली होती.
या संदर्भात आमदार रोहित पवार यांनी बुधवारी (दि. 7) राज्यपाल सी. पी. राधाकृष्णन यांची भेट घेतली आणि याबाबत सविस्तर चर्चा केली. राज्यपाल राधाकृष्णन यांनी या संदर्भातील माहिती मागवून लवकरच प्रशासनाला योग्य त्या सूचना देण्याचे आश्वासन दिल्याचे आमदार रोहित पवार यांनी सांगितले.
