मुंबई उच्च न्यायालयाचे नवनियुक्त मुख्य न्यायमूर्ती आलोक आराधे यांनी मंगळवारी पदाची शपथ घेतली. राजभवन येथे छोटेखानी शपथविधी समारंभ पार पडला. यावेळी राज्यपाल सी. पी. राधाकृष्णन यांनी मुख्य न्यायमूर्ती आराधे यांना पदाची शपथ दिली. त्यानंतर राज्यपालांनी न्यायमूर्ती आराधे यांना पुष्पगुच्छ देऊन त्यांचे अभिनंदन केले.
शपथविधी समारंभाला उपमुख्यमंत्री अजित पवार, एकनाथ शिंदे, विधानसभा अध्यक्ष राहुल नार्वेकर, कौशल्य विकास मंत्री मंगलप्रभात लोढा, उच्च न्यायालयातील इतर न्यायमूर्ती उपस्थित होते. सुरुवातीला राज्याच्या मुख्य सचिव सुजाता सौनिक यांनी न्यायमूर्ती आराधे यांच्या नियुक्तीबाबत केंद्र सरकारची अधिसूचना वाचून दाखवली.
