जम्मू काश्मीरमध्ये दहशतवाद्यांविरोधातील मोहिमेदरम्यान गुरुवारी कुपवाडात एका दहशतवाद्याला कंठस्नान घालण्यास सुरक्षा दलाला यश आले आहे. सुरक्षा दलाने ठार केलेल्या दहशतवाद्याकडील शस्त्रास्त्रे आणि दारुगोळा जप्त केला आहे.
कुपवाडा जिल्ह्यातील लोलाब परिसरात दहशतवाद्यांविरुद्ध सुरक्षा दलाची कारवाई सुरू होती. यात एका दहशतवाद्याचा खात्मा करण्यात आला. मोहिमेदरम्यान एक एके रायफल, दोन हातबॉम्ब, चार एके मॅगझिन, दारूगोळा आणि इतर युद्धसदृश साहित्य जप्त करण्यात आल्याचे अधिकाऱ्यांनी सांगितले.
लोलाब भागात मंगळवारी कारवाई सुरू करण्यात आली होती. यानंतर बुधवारी या कारवाईत एक दहशतवादी मारला गेला. तर बांदीपोरा जिल्ह्यातील केत्सून जंगलात मंगळवारी एका दहशतवाद्यालाही ठार करण्यात आले. बांदीपोरा जिल्ह्यात लष्कराचे ऑपरेशन अद्याप सुरू आहे.
