छत्रपती संभीजनगर महामार्गावर एका युवकाला लुटण्यात आल्याची धक्कादायक घटना घडली आहे. दरोडेखोरांनी युवकावर गोळीबर केला असून 17 वर्षीय शेख इम्रान शेख एजाज याच्या छातीत गोळी लागल्याने तो गंभीर जखमी झाला आहे. त्याला तत्काळ छत्रपती संभाजीनगर येथील खाजगी रुग्णालयात दाखल करण्यात आले आहे.
सदर घटना छत्रपती संभाजीनगर महामार्गावर नागेवाडीजवल गुरुवारी (30 जानेवारी 2025) रात्री 10.15 च्या सुमारास घडली आहे. मिळालेल्या माहितीनुसार, जालना शहरातील चंदझिरा भागातील स्क्रॅपचा व्यापारी शेख इम्रान शेख एजाज हा 17 वर्षीय युवक चारचाकी ब्रेझा गाडी घेऊन दुरुस्तीसाठी 2 लाख रुपयांची रक्कम घेऊन छत्रपती संभाजीनगर येथे गेला होता. कार दुरुस्त झाल्यानंतर काही रक्कम घेऊन तो पुन्हा जालन्याला निघाला होता. त्याने आपली दुरुस्त केलेली गाडी नागेवाडी शिवारात लावली आणि दुचाकी घेऊन तो रात्री चंदनझिरा येथे निघाला होता. याच दरम्यान तीन दरोडेखोरांनी त्याची वाट अडवली. त्यांच्यात झटापट झाली आणि या झटापटीत एका दरोडेखोराने गावठी पिस्तुलातून एक गोळी इम्रानच्या दिशेने झाडली. छातीत गोळी लागल्याने तो खाली पडला आणि दरोडेखोर 95 हजार रुपयांची रक्कम घेऊन पसार झाले.
इम्रान याच्या छातीच्या उजव्या बाजूला गोळी लागली असून नातेवाईकांनी रात्रीच त्याला छत्रपती संभाजीनगर येथील सिग्मा हॉस्पिटलमध्ये दाखल केले आहे. घटनेची माहिती मिळताच चंदनझिरा पोलीस ठाण्याचे पोलीस उपनिरीक्षक एम. बी. स्कॉट, सहायक फौजदार सय्यद यांनी आज 31 जानेवारी रोजी छत्रपती संभाजीनगर येथे जाऊन जखमी युवकाचा जवाब नोंदवला आहे. चंदनझिरा पोलीस ठाण्यात गुन्हा नोंदविण्याची प्रक्रिया सुरू आहे.
