भोकरदन तालुक्यातील वाळसा वडाळा गावातील ज्ञानेश्वर भिका आहेर या 30 वर्षीय तरुणाने लिंबाच्या झाडाला गळफास घेऊन आत्महत्या केल्याची घटना दहा दिवसांपूर्वी घडली होती. या घटनेनंतर आत्महत्या करणाऱ्या आहेर यांच्या पत्नी अंजना ज्ञानेश्वर आहेर यांनी भोकरदन पोलीस ठाण्यात फिर्याद दाखल करत एका भोंदूबाबाच्या त्रासाला कंटाळून पतीने आत्महत्या केल्याचे फिर्यादीत म्हटले. या फिर्यादीवरून भोकरदन पोलिसांनी भोंदूबाबाला आत्महत्येस प्रवृत्त केल्याप्रकरणी बुलढाणा जिल्ह्यातील गुम्मी गावातून ताब्यात घेतले.
ज्ञानेश्वर भिका आहेर पत्नी अंजना व मुलीसोबत बुलढाणा जिल्ह्यातील चामनगाव (धाड) या ठिकाणी दर्शनासाठी गेले होते. भोंदूबाबाशी त्याची ओळख झाली. या ओळखीतून भोंदूबाबा यांनी मोबाईल नंबर आणि गावाचा पत्ता घेत अंजनावर वाईट नजर ठेवून फोन करून आणि चिठ्ठी पाठवून त्रास देण्यास सुरुवात केली.
वारंवार ज्ञानेश्वर याला फोन करून आणि चिठ्या पाठवून तुझी मुलगी ईश्वरी ही माझीच आहे. ईश्वरी मला पाहिजे नाहीतर मी तुमच्यावर 5 से 10 लाखांचा मानहानीचा दावा दाखल करेल, असे म्हणत सतत त्रास दिला. त्रासाला आणि बदनामी होईल या भीतीने ज्ञानेश्वर यांनी आत्महत्या केल्याचे उघड झाले.
पोलिसांनी या प्रकरणी तपास केला असता आरोपी भोंदूबाबा गणेश लोखंडे याला गुप्तधनासाठी नरबळी देण्यासाठी पायाळू मुलगी हवी होती. त्यासाठी त्याने ईश्वरी हिची मागणी केली होती. पती पत्नीने नकार दिल्याने या बाबाने एका वकिलामार्फत पती-पत्नीला सहा लाखांची नोटीसही बजावली होती. या भोंदूबाबाने नरबळीसाठी खड्डाही करून ठेवल्याची धक्कादायक बाब पोलीस चौकशीत समोर आली. त्यामुळे तो या पती-पत्नीला ब्लॅकमेल करत होता.
घाबरलेल्या ज्ञानेश्वरने आत्महत्या केल्याचेही तपासात उघड झाले. भोकरदन पोलिसांनी नरबळी देण्यासाठी मलीची मागणी करून आत्महत्येस प्रवृत्त केल्याप्रकरणी आरोपी भोंदूबाबा गणेश लोखंडे याच्या विरुद्ध गुन्हा दाखल करत त्याला अटक केली. या प्रकरणी बाबा सोबत आणखी कोण होत का? याचाही तपास पोलिसांकडून केला जात आहे. या घटनेने जिल्ह्यात एकच खळबळ उडाली असून, भोकरदन पोलीस अधिक तपास करत आहेत.
