विजयासाठी 12 चेंडूंत केवळ 23 धावांची गरज असताना सलग चार सामने जिंकून अपराजित असलेली दिल्ली जिंकता जिंकता रनआऊट झाली. आशुतोष शर्माने जसप्रीत बुमराला सलग दोन चौकार मारत विजयी लक्ष्य 9 चेंडूंत 15 धावांवर आणले होते, मात्र त्यानंतर सलग तीन चेंडूंवर आशुतोष शर्मा, कुलदीप यादव आणि मोहित शर्मा या तिन्ही फलंदाजांना रनआऊट करण्याची करामत मुंबईच्या क्षेत्ररक्षकांनी दाखवली आणि अवघ्या 12 धावांनी विजयाचा घास दिल्लीच्या मुखातून खेचून आणला.
मुंबईने रायन रिकल्टन (41), सूर्यकुमार यादव (40), तिलक वर्मा (59) आणि नमन धीर (ना. 38) यांच्या फटकेबाजीमुळे 5 बाद 205 अशी आव्हानात्मक मजल मारली होती. मुंबईच्या 206 धावांच्या आव्हानाचा पाठलाग करताना जेक फ्रेझर-मॅकगर्कला डावाच्या पहिल्याच चेंडूवर दीपक चहरने बाद केले. मात्र या सनसनाटी सुरुवातीनंतर करुण नायरने 40 चेंडूंत 89 धावांची घणाघाती खेळी करत सलामीवीर अभिषेक पोरेलसह 119 धावांची भागी रचत दिल्लीला सलग पाचव्या विजयाच्या दिशेने नेले.
मात्र ही जोडी फुटल्यानंतर सामन्यात चढउताराची एण्ट्री झाली. करुण शर्माने पोरेल आणि केएल राहुलची विकेट काढत सामना मुंबईच्या दिशेने वळवला. शेवटच्या क्षणी आशुतोष शर्मा (17) आणि विपराज निगमने (14) तो पुन्हा दिल्लीकडे झुकवला, पण बुमराच्या षटकात दिल्ली विजयाच्या दिशेने धावताना धडपडली आणि सलग तीन फलंदाजांना अचूक चेंडूफेकीने धावबाद करत मुंबईने आपल्या दुसऱया विजयाची नोंद केली. 36 धावांत 3 विकेट टिपणारा करुण शर्मा मुंबईच्या विजयाचा शिल्पकार ठरला.
