कोलकाताच्या गोलंदाजांनी केलेल्या भेदक माऱ्यापुढे हैदराबादच्या विस्फोटक फलंदाजांनी अक्षरश: लोटांगण घातले. कोलकाताने प्रथम फलंदाजी करताना 200 धावांचा डोंगर उभारला होता. आव्हानाचा पाठलाग करण्यासाठी उतरलेल्या हैदराबादची चांगलीच तारांबळ उडाली. कोलकाताने केलेल्या भेदक आणि अचूक माऱ्यापुढे हैदराबादचे फलंदाज हजेरी लावून माघारी परतत होते. कामिंडू मेंडिस (27 धावा) आणि क्लासेन (33 धावा) यांनी खेळात थोडी रंगत आणण्याचा प्रयत्न केला. परंतु त्यांना इतर फलंदाजांची साथ न मिळाल्यामुळे हैदराबादचा संपूर्ण संघ 120 धावांवर बाद झाला.
