युरोपियन अंतराळ प्रकल्पाला रविवारी मोठा धक्का बसला आहे. युरोपमधून उपग्रह प्रक्षेपण जलद करण्यासाठी विकसित करण्यात आलेले रॉकेट नॉर्वेमध्ये उड्डाण घेतल्यानंतर अवघ्या 40 सेकंदातच कोसळले. यानंतर रॉकेटमध्ये स्फोट झाला. या घटनेचा व्हिडिओ समोर आला आहे. जर्मन स्टार्टअप इसार एरोस्पेसने याला प्रारंभिक चाचणी असे म्हटले आहे.
अहवालानुसार, स्पेक्ट्रम रॉकेट युरोपमधून यशस्वी प्रक्षेपण करण्याचा प्रयत्न करत होते. प्रारंभिक प्रक्षेपण अपेक्षेपेक्षा लवकर संपू शकते, असा इशाराही इसार एरोस्पेसने आधीच दिला होता. रॉकेटचा स्फोट होऊनही, या घटनेमुळे भविष्यातील मोहिमांसाठी उपयुक्त ठरणारा महत्त्वाचा डेटा मिळाल्याचा दावा कंपनीने केला आहे.
एएफपीच्या वृत्तानुसार, प्रत्येक उड्डाण आम्हाला डेटा आणि अनुभव देते, त्यामुळे ते आमच्यासाठी महत्त्वाचे आहे. 30 सेकंदांचे उड्डाण देखील आमच्यासाठी एक मोठी उपलब्धी असेल, असे इसार एरोस्पेसचे सह-संस्थापक आणि सीईओ डॅनियल मेट्झलर यांनी प्रक्षेपणापूर्वी सांगितले. कंपनीला या चाचणीद्वारे कक्षेत पोहोचण्याची अपेक्षा नव्हती. आतापर्यंत कोणत्याही कंपनीला त्यांचे पहिले ऑर्बिटल प्रक्षेपण वाहन यशस्वीरित्या कक्षेत समायोजन करता आलेले नाही, असेही त्यांनी पुढे नमूद केले.
