मुंबई-पुणे रेल्वेमार्गावर धावणारी इंटरसिटी, डेक्कन एक्स्प्रेस तीन दिवस बंद राहणार आहे. 28 ते 30 जूनदरम्यान या गाडय़ा बंद राहणार असून त्यामुळे प्रवाशांची मोठी गैरसोय होणार आहे.
पुणतांबा-काणेगाव आणि दौंड-मनमाड मार्गावरील दुपदरीकरणाच्या कामामुळे या एक्स्प्रेस गाडय़ा रद्द करण्यात आल्या आहेत. पुणे-मुंबई इंटरसिटी एक्स्प्रेस 28 जून रोजी धावणार नसून 29 जूनची मुंबई-पुणे डेक्कन एक्स्प्रेसही रद्द करण्यात आली आहे. याच दिवशी धावणारी ‘पुणे-मुंबई इंटरसिटी’देखील रद्द करण्यात आली आहे. तसेच 30 जून रोजीची मुंबई-पुणे इंटरसिटीही रद्द करण्यात आली आहे. मुंबईहून पुण्यासाठी आणि पुण्याहून मुंबई असा प्रवास करणाऱया प्रवाशांना या एक्स्प्रेस गाडय़ा रद्द केल्याचा मोठा फटका बसणार आहे.
