टीम इंडिया आणि न्यूझीलंड यांच्यामध्ये झालेल्या तीन सामन्यांच्या कसोटी मालिकेत न्यूझीलंडच्या संघाने निर्विवाद वर्चस्व गाजवत 3-0 अशा फरकाने ऐतिहासिक मालिका विजय साजरा केला. या मालिकेत कर्णधार रोहित शर्मा आणि विराट कोहली यांच्या खराब कामगिरीचा टीम इंडियाला चांगलाच फटका बसला. त्यांच्या या कामगिरीवर नाराज होत अनेकांनी वेगवेगळ्या प्रतिक्रिया दिल्या आहेत. अशातच टीम इंडियाचे माजी खेळाडू एस श्रीकांत यांनी रोहित शर्मा बाबत मोठे वक्तव्य केले आहे.
न्यूझीलंडविरुद्ध झालेल्या तीन सामन्यांमध्ये रोहित शर्माने 6 डावांमध्ये फक्त 91 धावा केल्या. त्यामुळे सर्व सामन्यांमध्ये टीम इंडियाची सुरूवात खराब झाली. त्याचा संघाला चांगलाच फटका बसला. रोहितच्या खराब कामगिरीवर बोट ठेवत एस श्रीकांत यांनी मोठे वक्तव्य केले आहे. ते म्हणाले की, “आता सर्वजन विचार करू लागले आहेत की, रोहित शर्मा जर ऑस्ट्रेलियामध्ये चांगली कामगिरी करू शकला नाही, तर बहुतेक कसोटी क्रिकेटमधून तो निवृत्ती घेईल.” असे एस श्रीकांत म्हणाले आहेत.
ते पुढे म्हणाले की, “रोहितने यापूर्वीच टी-20 क्रिकेटमधून निवृत्ती जाहीर केली आहे. कसोटी क्रिकेटमधून निवृत्ती घेतल्यानंतर रोहित फक्त वनडे सामने खेळेल. तसेच आपल्याला एक गोष्ट लक्षात ठेवली पाहिजे की, रोहितचे आता वय झाले असून तो आता तरुण राहिला नाही.” असे एस श्रीकांत म्हणाले आहेत.
