अलाहाबाद उच्च न्यायालयाने एका प्रकरणात महत्त्वाचा निकाल नुकताच दिलेला आहे. यामध्ये त्यांनी म्हटले आहे की, स्तन पकडणे किंवा महिलेच्या पायजम्याची नाडी तोडणे हा बलात्कार नाही. सदर प्रकार हा लैंगिक छळ असल्याचे न्यायमूर्ती राम मनोहर मिश्रा यांनी कासगंजच्या पटियाली पोलीस ठाण्यात झालेल्या गुन्ह्याबाबत निर्णय दिलेला आहे.
उच्च न्यायालयाने दिलेल्या या निर्णयाच्या आधारावर कासगंज जिल्ह्यातील तीन आरोपींना मोठा दिलासा मिळाला आहे. उच्च न्यायालयाने आरोपीने दाखल केलेली फौजदारी पुनरीक्षण याचिका अंशतः स्वीकारताना, आपल्या निकालात म्हटले आहे की, पॉक्सो कायद्याच्या कलम १८ आणि बलात्काराचा प्रयत्न अंतर्गत आरोपीविरुद्ध जारी केलेले समन्स चुकीचे आहेत. उच्च न्यायालयाने कनिष्ठ न्यायालयाला समन्स आदेश बदलण्यास आणि विनयभंग आणि POCSO कायद्याच्या इतर कलमांखाली समन्स जारी करण्यास सांगितले आहे.
काय प्रकरण आहे?
10 नोव्हेंबर 2021 रोजी संध्याकाळी 5 वाजता उत्तर प्रदेशातील कासगंज जिल्ह्यातील पटियाली पोलिस स्टेशन परिसरात घडलेल्या एका घटनेशी संबंधित आहे. यामध्ये एका महिलेने पोलिसांकडे तक्रार दाखल केली होती की, ती तिच्या 14 वर्षांच्या मुलीसोबत, रस्त्यात पवन, आकाश आणि अशोक या तीन तरुणांनी मुलीला घरी सोडण्याच्या बहाण्याने त्यांच्या दुचाकीवर बसवले. एफआयआरमध्ये म्हटले आहे की, आरोपीने वाटेत एका कल्व्हर्टजवळ गाडी थांबवली आणि मुलीचे स्तन पकडून तिच्या पायजम्याची नाडी तोडली. यानंतर, चुकीच्या हेतूने, त्यांनी तिला ओढायला सुरुवात केली. दरम्यान, आरडाओरडा ऐकून तिथे लोकांची गर्दी जमली. गर्दी जमताक्षणी आरोपी त्या मुलीला सोडून तिथून पळून गेले. आरोपीविरुद्ध बलात्कारासाठी भारतीय दंड संहितेच्या कलम 376 आणि गुन्हा करण्याचा प्रयत्न करण्यासाठी पोक्सो कायद्याच्या कलम 18 अंतर्गत गुन्हा दाखल करण्यात आला आहे. कनिष्ठ न्यायालयाने या कलमांखाली आरोपींविरुद्ध समन्स जारी केले.
न्यायाधीश काय म्हणाले?
कनिष्ठ न्यायालयाच्या निर्णयाविरुद्ध आरोपीने गेल्या वर्षी अलाहाबाद उच्च न्यायालयात फौजदारी सुधारणा याचिका दाखल केली होती. उच्च न्यायालयाने आरोपीची याचिका अंशतः स्वीकारून या प्रकरणात एक महत्त्वाचा निर्णय दिला आहे. न्यायमूर्ती राम मनोहर नारायण मिश्रा यांच्या एकल खंडपीठाने आपल्या निकालात म्हटले आहे की, महिलेचे स्तन पकडणे तसेच तिच्या पायजमाची नाडी तोडणे आणि तिला ओढणे हा बलात्काराचा प्रयत्न मानता येणार नाही.
