प्रयागराजमध्ये सुरू असलेल्या महाकुंभमेळ्यात ग्रीस देशातील तरुणीने हिंदुस्थानातील तरुणासोबत लग्नगाठ बांधली. या तरुणीचे नाव पेनेलोप असून तरुणाचे नाव सिद्धार्थ शिव खन्ना आहे. या दोघांनी हिंदू रीतिरिवाजाप्रमाणे विवाह केला. या लग्न सोहळ्याला साधू-संतांसोबत अनेकांची उपस्थिती होती. जुना आखाडय़ाचे महामंडलेश्वर यतींद्रानंद गिरी यांनी कन्यादान केले.
सनातन धर्म हा आनंदी जीवन जगण्याचा आणि जन्म-पुनर्जन्माच्या चक्रातून मुक्त होण्याचा मार्ग आहे, असे लग्नानंतर पेनेलोप हिने म्हटले आहे. पेनेलोप हिने अथेन्समधील एका प्रसिद्ध विद्यापीठातून टुरिझम मॅनेजमेंटमध्ये पदवी पूर्ण केलीय, तर सिद्धार्थ हा योगगुरू आहे. सिद्धार्थ हा वेगवेगळ्या देशांत जाऊन योगा शिकवतो. तो नवी दिल्लीच्या पश्चिम पंजाबी बाग येथे राहतो. लग्न झाल्यानंतर व्यक्त होण्यासाठी माझ्याकडे शब्द नाहीयेत. माझे लग्न वैदिक शास्त्रानुसार आध्यात्मिक पद्धतीने झालेय. हे सगळे अद्भुत असे आहे. मी प्रचंड आनंदी झाले आहे, असे पेनेलोप हिने म्हटलेय, तर सिद्धार्थने पेनेलोपला लग्न कुठे हिंदुस्थानात की ग्रीसला करायचे असे विचारले होते, परंतु पेनेलोपने हिंदुस्थान निवडले.
सर्व काही अविश्वसनीय
सध्या लग्नात दारू पिण्याचा प्रकार प्रचंड वाढला आहे, परंतु आमचे लग्न एक वेगळ्या पद्धतीने आणि दिव्य, आध्यात्मिक पद्धतीने झालेय. मी याआधी कधीच कोणत्याही हिंदुस्थानी लग्नात सहभागी झाले नाही, परंतु माझे लग्न हिंदुस्थानी पद्धतीने झालेय याचा मला प्रचंड आनंद झालाय. प्रयागराजमध्ये महाकुंभमेळा सुरू आहे. या ठिकाणी लग्न केले हे खरोखर अविश्वसनीय आहे, असे पेनोलोप म्हणाली.
