नगर येथील हॉटेल यश पॅलेसच्या व्यवस्थापकाला रस्त्यात गाठून दमदाटी करून मारहाण केल्याची घटना घडल्यामुळे शहरांमध्ये खळबळ उडाली आहे. शहरामध्ये आता मोठ्या प्रमाणामध्ये गुंडाराज सुरू झाल्याची चर्चा होत आहे. याप्रकरणी कोतवाली पोलिस ठाण्यामध्ये सचिन कोतकरसह 6 जणांविरुद्ध गुन्हा दाखल करण्यात आला आहे.सचिन कोतकरसह हॉटेल उदयनराजे पॅलेस येथील रोशनकुमार मिश्र उर्फ राजन कुमार, प्रिन्स कुमार सिंग , निरज कुमार , अमन श्रीकांत सिंग , सुनिल कुमार सिंग , हनुमान रामदास झरेकर आणि इतर 4 ते 5 अनोळखी व्यक्तींविरोधात गुन्हा दाखल करण्यात आला आहे. या प्रकरणी राकेशकुमार रामनारायण सिंग (वय 45, मॅनेजर,यश पॅलेस) यांनी तक्रार दाखल केली आहे.
नगर शहरांमध्ये सक्कर चौक या परिसरामध्ये हॉटेल यश पॅलेस व उदयनराजे पॅलेस अशी दोन मोठे हॉटेल समोरासमोर आहेत. हॉटेल यश पॅलेस या ठिकाणी सध्या राकेश कुमार हे व्यवस्थापक म्हणून काम पाहत आहे. पूर्वी ते उदयनराजे या हॉटेलमध्ये काम करत होते. उदयनराजे हे भानुदास कोतकर यांच्या अधिपत्याखाली या हॉटेलचा कारभार सध्या सचिन कोतकर पाहात आहेत. या ठिकाणी काम करणारे राकेश कुमार यांना याआधीही दमदाटी करण्यात आली होती. यश पॅलेस हॉटेलमध्ये काम करू नको, असा दम त्यांना दिला होता. 2021 मध्ये राकेशकुमार यश पॅलेस येथे नोकरीला आले. तेव्हापासून हॉटेल उदयनराजे पॅलेसचे मालक सचिन कोतकर त्यांना दम देत आमच्यासमोरच्या हॉटेल यश पॅलेसमध्ये काम करु नको. तू इतर कोठेही काम कर, असे म्हणत मला दमदाटी करत असत, असे त्यांनी तक्रारीत म्हटले आहे. या प्रकरणानंतर पोलीस अधिक्षक कार्यालय नगर येथे तक्रार अर्ज दिला होता.
यश पॅलेस हॉटेल येथील कर्मचारी पिंटू विनोद सिंग याला हॉटेल उदयनराजे पॅलेस येथील रोशन कुमार मिश्रा व त्याचे साथीदारांनी विनाकारण मारहाण केली होती. त्यावेळी पिंटू विनोद सिंग याने तक्रार दिली होती. त्यानंतर वेळोवेळी उदयनराजे पॅलेस येथील सुरज आप्पासाहेब शेळके, गणेश पांडुरंग सातपुते , सचिन पांडुरंग सातपुते यांना सचिन कोतकर हे माझ्याकडे पाठवत होते आणि धमकावत होते. सोमवारी रात्री राकेश कुमार यांना उदयनराजे पॅलेस हॉटेल येथील प्रिन्स याने फोन करत आपल्याला शिवीगाळ केली होती. त्यानंतर राकेश कुमार हे हॉटेल यश पॅलेस बंद करून घरी जात असतांना रात्री 12.50 वाजण्याच्या सुमारास हॉटेल यश पॅलेस समोर, शक्कर चौक, नगर येथे सचिन कोतकर आणि त्यांच्या साथीदारांनी शिवीगाळ करत तू यश पॅलेस हॉटेल येथे काम करु नकोस, तू येथून कोठेही जा, असा दम दिला. असे केले नाही तर तुला नगरमध्ये राहू देणार नाही. तुला जिवंत ठेवणार नाही, असे धमकावत ठार करण्याची धमकी दिली. या घटनेची माहिती मिळाल्यानंतर हॉटेल यश पॅलेसचे संचालक योगीराज गाडे हे तात्काळ हे या ठिकाणी आले. त्यानंतर येथील कोतवाली पोलीस ठाण्यामध्ये सचिन कोतकरसह त्याच्या साथीदारांवर गुन्हा दाखल केला आहे.
