विधानसभा निवडणुकीतील विजयानंतर झारखंडमध्ये हेमंत सोरेन यांच्या नेतृत्वाखाली नवीन सरकार स्थापनेची प्रक्रिया सुरू आहे. सूत्रांच्या माहितीनुसार, 26 नोव्हेंबरला नवीन मुख्यमंत्री म्हणून हेमंत सोरेन यांचा शपथविधी सोहळा पार पडणार आहे. या सोहळ्याला तृणमूल काँग्रेसच्या प्रमुख आणि पश्चिम बंगालच्या मुख्यमंत्री ममता बॅनर्जी, काँग्रेस नेते राहुल गांधी, सपा प्रमुख अखिलेश यादव, आपचे संयोजक अरविंद केजरीवाल, आरजेडी नेते तेजस्वी यादव, डाव्यांचे दिपंकर भट्टाचार्य यांच्यासह अनेक विरोधी पक्षांचे नेते उपस्थित राहणार आहेत.
झारखंड मुक्ती मोर्चा (JMM) च्या नेतृत्वाखालील झारखंड विधानसभा निवडणुकीत 56 जागांसह जबरदस्त विजय नोंदवून आघाडीने सत्ता राखली आहे. एकूण 81 सदस्यीय विधानसभेत जेएमएमने 56 जागा जिंकल्या. तर भाजपच्या नेतृत्वाखालील राष्ट्रीय लोकशाही आघाडीला (एनडीए) अवघ्या 24 जागांवर समाधान मानावे लागले.
विधानसभेत बहुमतासाठी 41 जागांची आवश्यकता आहे. भाजपने 21 जागा जिंकून राज्यातील दुसरा सर्वात मोठा पक्ष ठरला आहे. तर जेएमएमने 43 जागा लढवल्या आणि त्यापैकी 34 जिंकल्या. या आतापर्यंत पक्षाने जिंकलेल्या सर्वाधिक जागा आहेत. काँग्रेसने 16 जागा जिंकल्या, लालू प्रसाद यादव यांच्या आरजेडीने चार आणि सीपीआय (एमएल) दोन जागा जिंकल्या. निवडणुकीतील विजयानंतर झारखंडचे मुख्यमंत्री हेमंत सोरेन यांनी ‘इंडिया’ आघाडीच्या उत्कृष्ट कामगिरीबद्दल राज्यातील जनतेचे आभार व्यक्त केले.
झारखंड सरकारने विधानसभा निवडणुकीच्या काही महिन्यांपूर्वी लोकप्रिय ‘मईयां सन्मान योजना’ सुरू केली होती. या योजनेचा जेएमएमच्या महत्वाचा वाटा आहे. या योजनेअंतर्गत, 18-50 वयोगटातील महिलांना 1,000 रुपयांची आर्थिक मदत दिली जाते. जेएमएमच्या नेतृत्वाखालील आघाडीने ती दरमहा 2,500 रुपये करण्याचे आश्वासन दिले आहे. सध्या झारखंडमधील सुमारे 57 लाख महिलांना या योजनेचा लाभ मिळत आहे.
