गणेशोत्सवानिमित्त कोकणात जाणाऱ्या चाकरमानी वाहतूक कोंडीने हैराण झाले आहेत. मुंबई-गोवा महामार्गावर कोलाडपासून ट्रॅफिक जाम झाल्याने तासनतास प्रवाशी एकाच ठिकाणी अडकले आहेत. तीन तासात गाडी अर्धा किमी सुद्धा पुढे सरकत नसल्याने कोलाड ते इंदापूरमध्ये चाकरमानी अडकले आहेत.
गणेशोत्सव उद्यावर येऊन ठेपल्याने गावी जाणाऱ्या चाकरमान्यांना घराचे वेध लागले आहेत. मात्र रस्त्यावरील खड्डे आणि वाहनांच्या लांबलचक रांगा यामुळे प्रवाशांचे प्रचंड हाल होत आहेत. कोलाडपासून जवळपास दीड-दोन तास गाड्या पुढे सरकतच नाहीत. यामुळे लहान मुलं आणि वृद्ध व्यक्तींना नाहक त्रास होत आहे.
