हरियाणात फरीदाबादमधील रेल्वे पुलाखाली पाण्यात एक कार बुडाली आणि कारमध्ये उपस्थित बँक मॅनेजर आणि कॅशियरचा बुडून दुर्दैवी मृत्यू झाल्याची दुर्घटना घडली आहे.
हरियाणातील फरीदाबादला पावसाने चांगलेच झोडपले आहे. सतत पडणाऱ्या पावसामुळे शहरातील अनेक भागांमध्ये पाणी साचले आहे. त्यामुळे नागरिकांची चांगलीच तारांबळ उडाली असून फरीदाबादमधील रेल्वे अंडर ब्रीज परिसरात सुद्धा पाणी साचले होते. याच मार्गावरून प्रवास करत असताना शॉर्टकर्ट मारण्याच्या नादात HDFC बॅंकेचे मॅनेजर पुण्य श्रेय शर्मा आणि कॅशियर विराज द्विवेदी यांची XUV700 ही कार पाण्यात बुडाली. कार पाण्यात जाताच लॉक झाल्यामुळे, त्यांना कारमधून बाहेर पडणे शक्य झाले नाही. पाण्याची पातळी साधारण 10 फुटांच्या आसपास असल्यामुळे कार पाण्यामधून बाहेर काढणे दोघांनाही शक्य झाले नाही आणि बुडून दोघांचाही दुर्देवी मृत्यू झाला. कुटुंबाचा आधार हरपल्याने दोन्ही कुटुंबियांवर दु:खाचा डोंगर कोसळला आहे.
