पतंग उडविताना विहिरीत पडलेल्या 12 वर्षीय परप्रांतीय मुलीचा पाण्यात बुडून मृत्यू झाला. तालुक्यातील मानोरी ग्रामपंचायत हद्दीत आज सकाळी ही घटना घडली.
बिनीता बिष्णू थापा (वय १२, रा. मानोरी, ता. राहुरी) असे मृत्यू झालेल्या मुलीचे नाव आहे. नेपाळ येथील एक कुटुंब तालुक्यातील मानोरी ग्रामपंचायत हद्दीतील खिळे वस्ती रोड परिसरात राहत आहे. मुलीचे वडील हॉटेलमध्ये आचारी म्हणून काम करतात. त्यांना दोन मुले व दोन मुली आहेत. त्यापैकी बिनीता बिष्णू थापा (वय 12) ही मोठी मुलगी असून, ती पाचवीच्या वर्गात शिक्षण घेत होती. पाच महिन्यांपूर्वी ती नेपाळ येथून मानोरीला आली होती.
आज सकाळी बिनीताने हट्ट केल्यामुळे वडील बिष्णू थापा यांनी तिला पतंग आणून दिली. सकाळी 8.30 च्या दरम्यान ती घराजवळ इतर मुलांबरोबर पतंग उडवीत असताना घराजवळ असलेल्या विहिरीत ती पडली.
बिनीता पाण्यात बुडू लागल्याने इतर मुलांनी आरडाओरडा केला. हा आरडाओरड ऐकताच परिसरातील सर्जेराव जाधव, तुषार बाचकर यांनी ताबडतोब घटनास्थळी धाव घेऊन विहिरीत उड्या मारून पाण्यात बुडालेल्या विनीताचा शोध घेतला यावेळी विहिरीच्या तळाला असलेल्या बिनीताला दोरीने बांधून विहिरीतून बाहेर काढण्यात आले. तिला तातडीने राहुरी ग्रामीण रुग्णालयात उपचारासाठी दाखल करण्यात आले. मात्र, उपचारापूर्वीच तिचा मृत्यू झाल्याचे डॉक्टरांनी सांगितले. या घटनेमुळे मानोरी परिसरात हळहळ व्यक्त करण्यात येत आहे.
