श्रीलंकेच्या अंडर-19 क्रिकेट संघाचा माजी कर्णधार धम्मिका निरोशन (41) याची मंगळवारी रात्री (दि.16) गाले येथील अंबालांगोडा येथे त्याच्या राहत्या घरी गोळय़ा झाडून हत्या करण्यात आली. स्थानिक पोलिसांनी दिलेल्या माहितीनुसार धम्मिका निरोशन त्याची पत्नी आणि दोन मुलांसोबत असताना एका अज्ञात व्यक्तीने त्यांच्यावर गोळीबार केला. आरोपीला अद्याप पकडण्यात पोलिसांना यश आलेले नाही. सध्या या गुह्याचा कसून तपास सुरू आहे, मात्र या गुह्यामागचा हेतू अद्याप स्पष्ट झालेला नाही. धम्मिका निरोशन हा सुरुवातीच्या काळात श्रीलंकेतील सर्वोत्कृष्ट अष्टपैलू खेळाडूंपैकी एक होता. त्याने 2001 ते 2004 दरम्यान गाले क्रिकेट क्लबसाठी 12 प्रथम श्रेणी सामने आणि 8 लिस्ट ए सामने खेळले, 300 हून अधिक धावा केल्या आणि 19 विकेटही घेतल्या. त्याने 2000 मध्ये श्रीलंकेच्या अंडर-19 संघासाठी पदार्पण केले आणि दोन वर्षे अंडर-19 कसोटी आणि एकदिवसीय क्रिकेट खेळले. धम्मिका निरोशनने 10 सामन्यांमध्ये श्रीलंकेच्या अंडर-19 संघाचे नेतृत्व केले. त्याच्या नेतृत्वाखाली परवीझ महारूफ, अँजेलो मॅथ्यूज आणि उपुल थरंगासारखे खेळाडू खेळले आहेत.
