दहा वर्षांपूर्वी भाजपमध्ये आलेल्या माजी केंद्रीय मंत्री सूर्यकांता पाटील यांनी आज अचानक पक्ष सदस्यत्वाचा राजीनामा दिला. नांदेड लोकसभा मतदारसंघात झालेल्या लाजीरवाण्या पराभवाची समीक्षा करण्यासाठी माजी मंत्री रावसाहेब दानवे हे बैठक घेत असतानाच सूर्यकांता पाटील यांनी जिल्हाध्यक्षांकडे राजीनामा दिला.
दहा वर्षांपूर्वी सूर्यकांता पाटील या राष्ट्रवादीमधून भाजपमध्ये आल्या होत्या. आपण स्वखुशीने राजीनामा देत आहोत, असे त्यांनी सांगितले. पुढील भूमिकेबद्दल बोलताना त्यांनी ‘वेट अॅण्ड वॉच’ असे उत्तर दिले. दहा वर्षांत भाजपकडून खूप काही शिकायला मिळाले, असे त्यांनी राजीनामा पत्रात म्हटले आहे. अशोक चव्हाण यांच्या भाजप प्रवेशावर त्यांनी टीकेची झोड उठवली होती.
