रायगडच्या खोल समुद्रातील चविष्ट म्हावरं खवय्यांचा जीव की प्राण! पण सध्या म्हावरं कडाडल्याने खवय्यांचे चांगलेच वांदे झाले आहेत. जिभेचे चोचले पुरवण्यासाठी खिशाला चाट बसत आहे. मासळीचे हे भाव का कडाडले माहितीये? अहो, आपले मच्छीमार दादा सध्या होळी-धुळवडीच्या सुट्टीवर आहेत. तब्बल आठ-दहा दिवस ते कुटुंबासोबत सुट्टी एन्जॉय करीत असून सध्या मासेमारी बंद ठेवली आहे. त्यामुळे बाजारात आवक घटल्याने मासळीचे भाव गागनाला भिडले. एका पापलेटसाठी तब्बल १४०० रुपये मोजावे लागत असून सुरमई १ हजार, कोळंबी ५०० तर हलवा ५५० वर जाऊन पोहोचला आहे. त्यामुळे खवय्यांनो, जरा सबुरीनं… बुरा न मानो होली था…
होळी, धुळवड, रंगपंचमीचा सण साजरा करण्यासाठी खोल समुद्रात मासेमारी करणाऱ्या बोटीवरील तांडेल, खलाशी सध्या रजेवर गेले आहेत. यामुळे शेकडो मच्छीमार बोटी करंजा, मोरा, रेवस, मुळेखंड आदी विविध बंदरात नांगरून ठेवण्यात आल्या आहेत. पावसाळ्यातील दोन महिन्यांचा कालावधी वगळता वर्षातील दहा महिने खलाशी व तांडेल खोल समुद्रात मासेमारीच्या निमित्ताने कुटुंबापासून दूर असतात. परंतु हे मच्छीमार कुटुंबाबरोबर होळीचा सण साजरा करण्यासाठी माघारी परततात.
काही दिवस तरी मासेमारी बंद राहणार असल्याने होळी सणाच्या आधीपासूनच मासळीची आवक घटली आहे. परिणामी भाव चांगलेच कडाडले असल्याची माहिती वेस्ट कोस्ट पर्ससीन नेट फिशरमेन वेल्फेअर असोसिएशनचे संचालक रमेश नाखवा यांनी दैनिक ‘सामना’ शी बोलताना दिली.
मासळीचे नाव आधीचे दर आताचे दर
पापलेट ८०० ते १००० १२०० ते १४००
सुरमई ५५० ते ६५० ८५० ते १०००
कोळंबी ४०० ते ४५० ४५० ते ५००
रिबनफिश १२५ ते १५० १७५ ते २००
हलवा ४०० ते ४५० ५०० ते ५५०
माकुळ ३६० ते ४०० ५५० ते ६००
रावस ५५० ते ६०० ६५० ते ७००
जिताडा १००० १२००
बांगडा १२० ते १५० २००
