शॉर्टसर्किट झाल्याने एका खासगी शाळेच्या बसला आग लागल्याची घटना गुरुवारी सकाळी घडली. घटनेवेळी बसमध्ये 16 विद्यार्थी होते. मात्र सर्व विद्यार्थ्यांना सुखरुप बाहेर काढण्यात आले आहे. बसला आग लागताच चालक बस सोडून पसार झाला. अग्नीशमन दलाने तात्काळ धाव घेत आगीवर नियंत्रण मिळवले.
दिल्लीतील प्रीत विहार येथील मदर्स ग्लोबल स्कूलची बस 16 विद्यार्थ्यांना घेऊन शाळेत येत होती. विद्यार्थी बसमधून उतरत असतानाच बसमधून धूर निघू लागला. बसमधून धूर निघू लागताच चालक फरार झाला. विद्यार्थ्यांचा आरडाओरडा ऐकून आसपासचे लोक धावले आणि मुलांना सुखरुप बाहेर काढले.
अग्नीशमन दलाला आगीची माहिती देण्यात आली. अग्नीशमन दलाने तात्काळ धाव घेत आग विझवली. पालकांना आगीची माहिती मिळताच त्यांनी तात्काळ घटनास्थळी धाव घेत मुलांना ताब्यात घेतले.
