चंदगड विधानसभा मतदारसंघातील भाजपचे बंडखोर, अपक्ष उमेदवार शिवाजी पाटील यांच्या विजयानंतर जेसीबीमधून गुलालाची उधळण करण्यात येत असतानाच आगीचा भडका उडाल्याची घटना समोर आली आहे. यामध्ये नवनिर्वाचित आमदारांसह 34 जण जखमी झाले. त्यात काही महिला जखमी झाल्या आहेत.
शनिवारी सायंकाळी साडेआठ ते नऊच्या सुमारास घडलेल्या या घटनेचा व्हिडीओ सध्या सोशल मीडियावर व्हायरल होत आहे. शिवाजी पाटील यांची विजयी मिरवणूक काढण्यात आली. त्यावेळी औक्षण करण्यासाठी महिला थांबल्या होत्या. शिवाजी पाटील हे गाडीतून उतरले. त्यानंतर महिलांकडून औक्षण सुरू असतानाच जेसीबीमधून गुलालाची उधळण करण्यात आली. यावेळी गुलालामधील रासायनिक घटकांचा आगीशी संपर्क झाल्याने आगीचा भडका उडाल्याची प्राथमिक माहिती समोर आली. या दुर्घटनेत नवनिर्वाचित आमदार शिवाजी पाटील यांच्यासह काही महिला जखमी झाल्याची माहिती समोर येत आहे. सुदैवाने मोठी दुर्घटना टळली असून, सर्वजण सुखरूप आहेत.
