राजकोटवर इंग्लंडने राज्य गाजवत पाच टी-20 सामन्यांच्या मालिकेतील आपले आव्हान कायम राखत चुरस वाढवली होती. आता शुक्रवारी महाराष्ट्र क्रिकेट संघटनेच्या स्टेडियमवर रंगणाऱया चौथ्या सामन्यात पुन्हा एकदा हिंदुस्थान मालिका विजयासाठी उतरणार आहे, तर दुसरीकडे इंग्लंड मालिकेत 2-2 अशी बरोबरी साधण्यासाठी सज्ज झाला आहे. दोन्ही संघ तुल्यबळ आहेत आणि त्यातच इंग्लंडने राजकोटमध्ये आपली कमाल दाखवल्यामुळे पुण्यात टी-20 चा थरार पाहायला मिळणार, हे निश्चित आहे.
हिंदुस्थानने राजकोट जिंकून मालिका जिंकण्याची मौल्यवान संधी गमावल्यामुळे पुण्यातील लढतीला अनन्यसाधारण महत्त्व प्राप्त झाले आहे. तिसऱया सामन्यात सव्वाशे धावांत इंग्लंडचे आठ फलंदाज गारद झाले होते. त्यांचा डाव फार लांबण्याची शक्यताही नव्हती. मात्र लियाम लिव्हिंगस्टोनने केलेली खेळी आणि दहाव्या क्रमांकाच्या जोडीची 24 धावांची भागी सामन्याला कलाटणी देणारी ठरली. इंग्लंडने उभारलेले 172 धावांचे आव्हान हिंदुस्थानच्या फलंदाजांना पेललेच नाही.
इंग्लंडही जोशात
पहिले दोन सामने पराभूत झाल्यामुळे इंग्लंडचा संघ खचला होता, मात्र त्यांनी संधी मिळताच राजकोट जिंकत आपल्या आव्हानाला जीवनदान दिले. कर्णधार जोस बटलर हाच संघासाठी धावा ठोकतोय. मात्र फिल सॉल्ट, हॅरी ब्रुक या दोन्ही घणाघाती फलंदाजांना आपला फॉर्म अद्याप गवसलेला नाही. पण ते दोघेही पुण्यात आपली खेळी दाखवतील, असा विश्वास बटलरने व्यक्त केलाय. त्यामुळे मनोधैर्य उंचावलेला इंग्लंड पुण्यात बरोबरी साधून मालिकेला मुंबईपर्यंत ताणण्याचा प्रयत्न करणार आहे.
हिंदुस्थानची फलंदाजी चिंतेचा विषय
तिलक वर्मा आणि अभिषेक शर्मा हेच दोघे हिंदुस्थानच्या विजयात महत्त्वाचे फलंदाज ठरले. हे दोघेही राजकोटला अपयशी ठरल्यामुळे हिंदुस्थानला पराभवाची झळ बसली. या सामन्यात हार्दिक पंडय़ाने 40 धावा काढल्या असल्या तरी तो संघाला विजयासमीप पोहोचवू शकला नाही. तसेच संजू सॅमसन, सूर्यकुमार यादवचे सातत्याने अपयशी होणे ही संघासाठी चिंतेची बाब ठरतेय. रिंकू सिंहचा फिटनेस आणि खराब फॉर्मही संघाला अडचणीत आणणारा ठरतोय.
दुसरा वेगवान गोलंदाज खेळवणार?
हिंदुस्थानने खोलवर फलंदाजी करण्यासाठी केवळ एकाच वेगवान गोलंदाजाला खेळविण्याचा निर्णय पहिल्या तीन सामन्यांत घेतला होता, मात्र हा निर्णय राजकोटमध्ये अपयशी ठरला. त्यामुळे पुण्यात खेळताना हिंदुस्थानी संघ एक वेगवान आणि चार फिरकी याच फॉर्म्युल्यासह उतरतो की दुसरा वेगवान गोलंदाजही खेळवतो, हे उद्या सामन्याच्या आधीच निश्चितपणे कळू शकेल. राजकोटमध्ये हिंदुस्थानी संघव्यवस्थापनाने अर्शदीप सिंहला विश्रांती देत मोहम्मद शमीला खेळवले आणि हा निर्णय खूप महागडा ठरला. फॉर्मात असलेल्या अर्शदीपची उणीव संघाला प्रखरतेने जाणवली आणि चौदा महिन्यांनंतर संघात पुनरागमन करणाऱया मोहम्मद शमीला फारसे काही करता आले नाही.
