फेसबुक खाते निलंबित केल्याप्रकरणी तडजोड करण्यासाठी मेटाने अमेरिकेचे राष्ट्राध्यक्ष डोनाल्ड ट्रम्प यांना 25 दशलक्ष डॉलर्स देण्याचे मान्य केले आहे. मेटा ही फेसबुक आणि इंस्टाग्राम या सोशल मीडिया प्लॅटफॉर्मची मूळ कंपनी आहे. हा निकाल ट्रम्प यांचा विजय मानला जात आहे.
काय आहे प्रकरण?
अमेरिकेत 3 नोव्हेंबर 2020 रोजी झालेल्या अध्यक्षीय निवडणुकीत ट्रम्प यांचा पराभव करून बायडेन यांनी विजय मिळवला होता. यानंतर ट्रम्प यांच्या समर्थकांनी निवडणुकीत हेराफेरी केल्याचा आरोप केला होता. यानंतर 6 जानेवारी 2021 रोजी ट्रम्प यांच्या समर्थकांनी संसदेत घुसून तोडफोड केली. या हिंसाचारात एका पोलीस अधिकाऱ्यासह 5 जणांचा मृत्यू झाला होता. हिंसाचारानंतर ट्रम्प यांच्यावर समर्थकांना भडकावण्याचा आरोप करत त्यांचे फेसबुक आणि इन्स्टाग्राम अकाऊंट निलंबित करण्यात आले होते.
ट्रम्प यांनी फेसबुक आणि इंस्टाग्रामने चुकीच्या पद्धतीने सेन्सॉर केल्याचा दावा करत मेटा आणि त्याचे मुख्य कार्यकारी अधिकारी मार्क झुकरबर्ग यांच्याविरुद्ध खटला दाखल केला होता. हा खटला मिटवण्यासाठी मेटाने राष्ट्राध्यक्ष डोनाल्ड ट्रम्प यांना 25 दशलक्ष डॉलर्स देण्याचे मान्य केले आहे, असे कंपनीने सांगितले.
