धुळे शहरातील नागरिकांना पायाभूत सोयीसुविधा देण्यासाठी पैसा हवा म्हणून महापालिकेने मालमत्ता कर वसुलीकडे लक्ष केंद्रित केले आहे. धुळे शहरातील बहुसंख्य मालमत्ताधारकांकडे शंभर कोटींच्या आसपास रक्कम थकली आहे. प्रयत्न करूनही प्रशासनाला वीस कोटींपेक्षा अधिक रक्कम वसूल करता आलेली नाही. त्यामुळे आता थकबाकीदारांच्या घरासमोर ढोल-ताशे बडवून पैशांची मागणी केली जात आहे. महापालिकेच्या या प्रयत्नाला किती यश मिळते ते वसुली अंती समजेल.
धुळे महापालिकेचे कार्यक्षेत्र 46 चौरस किलोमीटरवरून 106 चौरस किलोमीटर झाले. आजूबाजूची दहा गावे महापालिकेच्या हद्दीत आली. साहजिकच नव्याने तयार झालेल्या उपनगरांमधील नागरिकांना रस्ते, पाणी, पथदिवे या मूलभूत सुविधांविषयी अपेक्षा वाढल्या. मात्र, महापालिकेच्या तिजोरीत मूलभूत सुविधा देण्यासाठी पैसे नसल्याने प्रशासनाने मालमत्ता कर वसुलीसाठी प्रयत्न केले. अनेकदा नोटीस बजावूनदेखील थकबाकीदार पैसे देत नसल्याने प्रशासन आक्रमक झाले. कमी-अधिक सदस्यांची एपूण 13 पथके तयार करण्यात आली. गेल्या दहा ते बारा वर्षांपासून मालमत्ता कर थकविणाऱ्यांच्या घरासमोर जाऊन आता ढोल-ताशा वाजविले जात आहेत.
मालमत्ता सीलबंदची कारवाई
धुळे शहरासह पूर्वेकडील बाळापूरलगतच्या अनेक थकबाकीदारांकडे गेल्या दोन दिवसांत महापालिकेत ढोल-ताशा बडवून पैशांची मागणी केली. ढोल-ताशा बडविल्यानंतरदेखील प्रतिसाद मिळत नसल्याने पथकाकडून काही मालमत्ता सीलबंद केल्या जात आहेत. महापालिकेच्या प्रशासन अमिता दगडे-पाटील यांनी कर्मचाऱ्यांना मालमत्ता कर वसुलीबाबत सक्त सूचना दिल्या आहेत.
