संतोष देशमुख हत्याप्रकरण तसेच वाल्मीक कराड यांच्याशी असलेल्या संबंधांवरून आधीच अडचणीत आलेल्या मंत्री धनंजय मुंडे यांच्या अडचणीत वाढ झाली आहे. विधानसभा निवडणुकीत खोटी माहिती दिल्याप्रकरणी परळीच्या कोर्टाने मंत्री धनंजय मुंडे यांना कारणे दाखवा नोटीस बजावली आहे.
विधानसभेच्या निवडणुकीत उमेदवारी अर्ज भरताना खरी माहिती दडविल्याबाबत करुणा मुंडे यांनी दाखल केलेल्या ऑनलाईन तक्रारींच्या अनुषंगाने परळीच्या फौजदारी न्यायालयाने मंत्री धनंजय मुंडे यांना न्यायालयाची कारणे दाखवा नोटीस बजावण्याचा आदेश दिला आहे. याबाबत 24 फेब्रुवारी रोजी परळीच्या फौजदारी न्यायालयात सुनावणी होणार असल्याचे तक्रारदाराचे वकील चंद्रकांत ठोंबरे यांनी म्हटले आहे. धनंजय मुंडे यांनी 2024 मध्ये परळी विधानसभा निवडणूक लढवण्यासाठी दाखल उमेदवारी अर्जासोबतच्या शपथपत्रात पत्नी राजश्री मुंडे आणि 3 मुली तसेच करुणा मुंडे यांच्या 2 मुलांचा उल्लेख केला होता, मात्र करुणा मुंडे यांच्या नावावरील मिळकतीबाबत कुठलाही उल्लेख केला नव्हता.
खोटी माहिती दिल्यास सहा महिने शिक्षेची तरतूद आहे. याबाबत तक्रार करण्याचा अधिकार आहे, असे पत्रकात म्हटले आहे. माहिती दडविल्याबाबत करुणा मुंडे यांनी बीड येथून परळीच्या फौजदारी न्यायालयात ऑनलाईन तक्रार दाखल केली होती.
