दिल्ली विधानसभा निवडणुकीच्या (Delhi Assembly Election 2025) पार्श्वभूमीवर माजी मुख्यमंत्री आणि आम आदमी पक्षाचे (AAP) अध्यक्ष अरविंद केजरीवाल (Arvind Kejriwal) यांनी मोठा दावा केला आहे. भाजपच्या केंद्र सरकारने आपल्या जवळच्या काही लोकांचे 10 लाख कोटी रुपयांचे कर्ज माफ केल्याचे ते म्हणाले आहेत. ते म्हणाले, ”एका व्यक्तीचे 46 हजार कोटी रुपये माफ करण्यात आलं आहेत. 400 ते 500 लोकांवर संपूर्ण सरकारी खजिना उधळला जात आहे.”
अरविंद केजरीवाल म्हणाले, ”ही केवळ दिल्लीच नाही तर देशाला वाचवण्याची निवडणूक आहे. देशाचा आणि राज्याचा पैसा कसा आणि कशावर खर्च करायचा हे जनतेनं ठरवायचं आहे. जनता कोणत्याही वस्तूंवर कर देते. हा जमा झालेला पैसा खर्च करण्याचे सरकारकडे दोन मार्ग आहेत. एक मार्ग म्हणजे लोककल्याणाच्या सुविधांवर खर्च करणं आणि दुसरा मार्ग म्हणजे आपल्या जवळच्या अब्जाधीश मित्रांना कर्ज देणं आणि काही वर्षांनी कर्ज माफ करणं.”
ते म्हणाले, ”गेल्या पाच वर्षात केंद्रातील भाजप सरकारनं 400-500 लोकांचं 10 लाख कोटी रुपयांचे कर्ज माफ केलं आहे. एका व्यक्तीवर 47 हजार कोटी रुपयांचे कर्ज होतं. त्यांना फक्त 450 कोटी रुपयांची सेटलमेंट करून उर्वरित कर्ज माफ केलं. आणखी एक होते, ज्यांच्यावर साडेसहा हजार रुपयांचे कर्ज होतं, ते केवळ दीड हजार कोटी रुपयांमध्ये सेटल झालं. याशिवाय दोन लोकांचे 50 हजार कोटी रुपये माफ करण्यात आलं.”
अरविंद केजरीवाल पुढे म्हणाले, ”दिल्लीतील लोकांकडे दोन मॉडेल्स आहेत, पहिले केजरीवाल मॉडेल, जिथे जनतेचा पैसा जनतेवर खर्च केला जातो आणि दुसरे भाजपचे मॉडेल, जिथे जनतेचा पैसा त्यांच्या श्रीमंत मित्रांच्या खिशात जातो. आता कोणते मॉडेल निवडायचे हे जनतेनं ठरवायचं आहे.”
