सध्या सणासुदीचे दिवस आहेत. सोने आणि चांदीच्या दरात दिवसेंदिवस वाढ होताना दिसत आहे. या काळात लोक आवडीने दागिने खरेदी करतात. असे असताना सोने-चांदीचे दर वाढलेले दिसत आहेत. आज 23 ऑक्टोबर, पुन्हा एकदा सोने आणि चांदी या दोन्ही मौल्यवान धातूंच्या दरात वाढ झाली आहे. चांदीचा दर थेट एक लाखाच्यावर गेला आहे. विशेष म्हणजे सोन्याच्या दरानेही 81 हजार रुपयांचा आकडा पार केला आहे.
सोने आणि चांदीच्या दराने उच्चांक पातळी गाठली आहे. चांदीचा भाव 1500 रुपयांच्या वाढीसह एक लाख रुपये प्रति किलो ग्रॅमवर पोहोचला आहे. गेल्या आठवड्यात शुक्रवारी चांदीचा भाव 99,500 प्रति किलोग्रॅम होता. चांदीच्या दरातील ही पाचवी दरवाढ असून चांदीचा दर 1.01 लाख रुपये प्रति किलोग्रॅमवर पोहोचला आहे. तसेच सोन्याच्या दरातही 99.5 टक्के शुद्धतेचे सोने 350 रुपयांनी वाढून 80,600 रुपये प्रति 10 ग्रॅमवर पोहोचले आहे.
सोने आणि चांदीच्या दरात का होतेय वाढ?
गेल्या काही दिवसांपासून सोने आणि चांदीच्या दरात वाढ होत आहे. यामागे अनेक कारणं आहेत. सध्या सणासुदीचा काळ आहे. त्यामुळे या काळात देशात दागिन्यांची मोठ्या प्रमाणात खरेदी होते. लग्नसराईलाही सुरुवात होणार आहे. त्यामुळे सोने आणि चांदीच्या मागणीत मोठ्या प्रमाणात वाढ होते. त्यामुळे सध्या सोने आणि चांदीच्या दरात वाढ झालेली पाहायला मिळत आहे. दुसरीकडे जागतिक पातळीवरही मोठ्या घडामोडी घडत आहेत. इस्रायल आणि हमास यांच्यातील युद्धामुळेही सोने आणि चांदीच्या दरात वाढ झाली आहे.
