दापोली तालुक्यातील दाभोळ येथून दापोलीकडे येणाऱ्या बसचे अचानक ब्रेक फेल झाल्याची घटना घडली आहे. ब्रेक लागत नसल्यामुळे चालक भाऊराव धोत्रे यांनी प्रसंगावधान दाखवत एसटी बस थेट रस्त्याला लागून असलेल्या गटारामध्ये उतरवली. या अपघातात एसटीचे नुकसान झाले आहे.
पोलिसांनी दिलेल्या माहितीनुसार, राहुल भाऊराव धोत्रे हे एसटी बस घेवून दाभोळहून दापोलीच्या दिशेने जात होते. याचवेळी बस वळणे येथे आली असता त्यांनी गाडीचा ब्रेक मारला असता ब्रेक लागला नाही. बसचे ब्रेक फेल झाल्याचे त्यांच्या लक्षात आल्याने गाडी थांबविण्यासाठी त्यांनी रस्त्याच्या डाव्या बाजूला असलेल्या गटारात बस उतरवली. या अपघातात बसमधून प्रवास करणारे काही प्रवासी किरकोळ जखमी झाले आहेत. जखमी प्रवाशांना उपचारांसाठी उपजिल्हा रूग्णालयात दाखल करण्यात आसे असून एसटी बसचे अंदाजे 10 हजार रुपयांचे नुकसान झाले आहे. या अपघाताची माहिती दापोली पोलीस ठाण्यात चालक राहुल भाऊराव धोत्रे यांनी दिली आहे. अधिक तपास सहाय्यक पोलीस उपनिरीक्षक अशोक गायकवाड करत आहेत.
