>> योगेश जोशी, [email protected]
आजचे पंचाग
तिथी – फाल्गुन शुद्ध चतुर्दशी 10.36 पर्यंत, त्यानंतर पोर्णिमा
वार – गुरुवार
नक्षत्र – पूर्वा
योग – धृती
करण – विष्टि
राशी – सिंह
आज चंद्र ग्रहण आहे. मात्र, ते हिंदुस्थानातून दिसणार नसल्याने सूतककाळ पाळण्याची गरज नाही.
आज होलिका दहन होत असल्याने होलाष्टकची समाप्ती होत आहे.
मेष
मेष राशीसाठी आजचा दिवस शुभ आहे. होळीनिमित्त गावी किंवा बाहेरगावी जाण्याचे बेत ठरण्याची शक्यता आहे. पंचम स्थानात चंद्र असल्याने मुलांकडे जास्त लक्ष देण्याची गरज आहे. सणाचा दिवस असल्याने आनंदात आणि उच्साहाचा दिवस असणार आहे. मात्र, व्यय स्थानात राहू सणासाठी खर्च वाढण्याची शक्यता आहे. एकादश स्थानात शनि असल्याने आर्थिक आवक होण्याची शक्यता असल्याने आर्थिक स्थिती चांगली राहणार आहे. चंद्र आणि शनीचे चांगले पाठबळ असले तरी राहूमुळे काही अडचणींचा सामना करावा लागण्याची शक्यता आहे. मात्र, सणानिमित्त मन प्रसन्न राहणार आहे.
वृषभ
वृषभ राशीच्या लोकांना आजचा दिवस घराकडे जास्त लक्ष देण्याची गरज आहे. होळीचा पर्वकाळ तुमच्या राशीसाठी फायद्याचा ठरणार आहे. अनेक दिवसांपासून प्रतीक्षा करत असलेली कामे मार्गी लागण्यास सुरुवात होणार आहे. गृहखरेदी किंवा वाहनखरेदीचे योग बनत आहेत. त्यामुळे घरात उत्साहाचे वातावरण राहणार आहे. चतुर्थ स्थानात चंद्र असल्याने ठरलेल्या कामात कुटुंबीयांची चांगली साथ मिळणार आहे. घरासाठी नवीन खरेदी होण्याची शक्यता आहे. गावातील घरी किंवा जवळचे प्रवास होण्याची शक्यता आहे. आय स्थानात राहू असल्याने आर्थिक स्थिती चांगली राहणार असल्याने प्रवास अडचणीशिवाय पूर्ण होणार आहेत. प्रथम स्थानात गुरु असल्याने चांगले पाठबळ मिळणार आहे.
मिथुन
मिथुन राशीला आजचा दिवस मानसन्मानाचा आहे. त्यामुळे होळीचा आनंद द्विगुणीत होणार आहे. तृतीय स्थानात चंद्र असल्याने अचानक मित्र किंवा नातलगांच्या भेटी होण्याची शक्यता आहे. सणाच्या वातावरणामुळे आत्मविश्वास आणि उत्साह वाढणार आहे. दशम स्थानात राहू असल्याने कार्यक्षेत्रात सावध राहण्याची गरज आहे. कार्यस्थळी तुमचा चांगला प्रभाव असल्याने मनासारखी कामे होणार आहेत. भाग्य स्थानातील शनिमुळे अनेक गोष्टींसाठी सहकार्य मिळण्याचे योग आहेत. मात्र, व्यय स्थानातील गुरुमुळे काही प्रमाणात खर्च वाढण्याची शक्यता आहे. होळीच्या सण आनंदात साजरा होणार आहे. त्यामुळे सध्या सणाचा आनंद घेण्याचे दिवस आहे.
कर्क
कर्क राशीच्या लोकांना आजचा दिवस धनलाभाचा आणि सकारात्मक आहे. होळीच्या सणाचा आनंद घेण्यासाठी दिवस उत्तम आहे. द्वितीय स्थानात चंद्र असल्याने आत्मविश्वासात वाढ होणार आहे. कोणतेही काम उत्साहात पूर्ण होणार आहे. कोणत्याही खरेदीत किंवा महत्त्वाच्या कामात कुटुंबियांचे सहकार्य मिळणार आहे. आता अनेक कामे मार्गी लागण्यास सुरुवात होणार आहे. होळीनिमित्त तुमच्या राशीचा शुभकाळ सुरू होत आहे. त्यामुळे मनावर आलेले दडपण दूर होणार आहे. भाग्य स्थानात राहू असल्याने कोणाशीही वादविवाद टाळण्यास नशिबाची चांगली साथ मिळणार आहे. मात्र,आता लवकरच शनी भाग्य स्थानात संक्रमण करणार असल्याने अडीचीमध्ये आलेल्या अडचणी कमी होणार आहेत. त्यामुळे होळीचे पर्व तुमच्या राशीसाठी शुभ ठरणार आहे.
सिंह
सिंह राशीच्या लोकांचा आज दिवस उत्साह वाढवणारा आहे.होळी सणानिमित्त खर्च झाला असला तरी त्यामुळे कुटुंबीय आनंदात असल्याने वातावरण चांगले राहण्याची शक्यता आहे. प्रथम स्थानातील चंद्रामुळे आत्मविश्वासात वाढ होणार आहे. होळीचे पर्व शुभ ठरणार असल्याने नवीन संधी समोर येण्याची शक्यता आहे. त्याचा फायदा करून घेण्याची गरज आहे. गुरुच्या पाठबळामुळे अनेक रखडलेली कामे मार्गी लागण्याची शक्यता आहे. वाढणारे खर्च आटोक्यात येत असल्याने समाधान लाभणार आहे. तुमच्या राशीतच चंद्रग्रहण होत असल्याने मनात नकारात्मक विचार येण्याची शक्यता आहे. मात्र, ते दूर सारून होळीच्या सणाचा आनंद घेण्यासाठी चांगला दिवस आहे.
कन्या
कन्या राशीच्या लोकांचा आज दिवस वाढत्या खर्चाकडे दुर्लक्ष करत सणाचा आनंद घेण्याचा आहे. व्यय स्थानात चंद्र असल्याने अनपेक्षित खर्च होण्याची शक्यता आहे. गुंतवणुकीबाबतचे निर्णय काही दिवस पुढे ढकलावे. कार्यक्षेत्रातही काही कटकटी होण्याची शक्यता आहे. मात्र, त्याकडे दुर्लक्ष करत कामाकडे लक्ष केंद्रीत करावे. भाग्य स्थानात गुरु असल्याने नशिबाची चांगली साथ मिळणार आहे. मात्र, सप्तम स्थानात राहू असल्याने व्यवसायात तोटा होणार नाही, याची काळजी घ्यावी. षष्ठ स्थानात शनीचा प्रभाव कमी होत आहे. त्याचाही फायदा होणार आहे. मात्र, कर्ज घेणे टाळावे आणि प्रकृतीकडे लक्ष देण्याची गरज आहे. आजचा दिवस सर्व व्याप दूर ठेवत सणाचा आनंद घेतल्यास आजचा दिवस आनंदात जाणार आहे.
तूळ
तूळ राशीच्या लोकांना आजचा दिवस शुभ असून फायद्याचा ठरणार आहे. आय स्थानात चंद्र असल्याने जुन्या गुंतवणुकीतून चांगला परतावा मिळण्याचे दिवस आहेत. दशम स्थानात गुरु असल्याने अनेक कार्यक्षेत्रात सकारात्मक गोष्टी घडणार आहेत. मात्र, षष्ठ स्थानात राहू असल्याने हितशत्रू डोके वर काढण्याची शक्यता आहे. मात्र, बुद्धीचातुर्याने त्यावर मात करणे शक्य होणार आहे. गुतंवणुकीसाठी चांगला काळ आहे. कार्यक्षेत्रात नवे प्रकल्प हाती आल्याने त्यातून चांगला फायदा होणार आहे. पैशांची आवक होत असली तरी पैसे वाचवल्यास आणि योग्य ठिकाणी गुंतवणूक केल्यास त्यातून चांगला फायदा मिळणार आहे. होळीचा सण आनंदात आणि उत्साहात साजरा करता येणार आहे.
वृश्चिक
वृश्चिक राशीने आजचा दिवस कामाचा व्याप वाढणार असला तरी होळी सणानिमित्त मन प्रसन्न राहणार आहे. तसेच नशीबाचीही चांगली साथ मिळणार आहे. कर्म स्थानात चंद्र असल्याने सर्व सहकाऱ्यांना सोबत घेत कामे पूर्ण करण्याकडे तुमचा कल असेल. कर्म स्थानातील चंद्रामुळे अचानक नवी जबाबदारी मिळणार आहे. तसेच व्यवसाय वाढीसाठी चांगला काळ आहे. त्याकडे लक्ष केंद्रीत केल्यास सकारात्मक बदल घडण्याची शक्यता आहे. शनीची अडीची संपत आल्याने संकटातून मार्ग सापडणार आहेत. तसेच आता होळीच्या सणापासून तुमच्या राशीचा चांगला काळ सुरू होत असल्याने त्याचा फायदा करून घेण्याची गरज आहे.
धनु
धनु राशीच्या लोकांना आजचा दिवस नशीबाची चांगली साथ मिळणार आहे. भाग्य स्थानात चंद्र असल्याने हाती घेतलेल्या कामात यश मिळणार आहे. कार्यक्षेत्रात सहकाऱ्यांची चांगली साथ मिळणार आहे. नशिबाची चांगली साथ असल्याने घरातील वातावरण प्रसन्न राहणार आहे. भाग्य स्थानातील चंद्रामुळे कठीण कामेही लवकरच पूर्ण करता येणार आहेत. चतुर्थ स्थानात राहू असल्याने कुटुंबाकडे जास्त लक्ष देण्याची गरज आहे. शनीची चांगली साथ मिळणार असली तरी षष्ठ स्थानातील गुरुमुळे काहीजण कामात अडचणी निर्माण होण्याची शक्यता आहे. होळीच्या पर्वाचा आनंद घेत सकारात्मक गोष्टींचा फायदा करून घेण्यासाठी चांगला काळ आहे.
मकर
मकर राशीच्या लोकांचा आज प्रकृतीकडे लक्ष देण्याची गरज आहे. चंद्र अष्टम स्थानात असल्याने प्रकृतीकडे लक्ष देण्याची गरज आहे. थकवा जाणवणे किंवा अंगदुखीचा त्रास होण्याची शक्यता आहे. मात्र, जुनी गुंतवणूक फायद्याची ठरण्याची शक्यता आहे. अनेक दिवसांपासून वाट पाहत असलेल्या चांगल्या संधी आता मिळण्याचे योग आहेत. तृतीय स्थानातील राहूमुळे भावंडाचे सहकार्य मिळण्याची शक्यता आहे. द्वितीय स्थानातील शनीमुळे चांगले आर्थिक पाठबळ मिळणार आहे. लवकरच साडेसातीचा अखेरचा टप्पा संपत असल्याने सर्व अडचणी संपून नवे सकारात्मक पर्व सुरू होणार आहे. त्याची सुरुवात होळीपासून होत आहे.
कुंभ
कुंभ राशीच्या लोकांना आजचा दिवस संमिश्र असणार आहे. चंद्र सप्तम स्थानात गुरुसोबत असल्याने जोडीदाराच्या प्रकृतीकडे लक्ष देण्याची गरज आहे. दुसऱ्या स्थानात राहू असल्याने कुटुंब,सहकारी आणि मित्रांचे चांगले सहकार्य मिळण्याचे योग आहेत. तसेच संपत्तीबाबत असलेले वादविाद संपण्याची शक्यता आहे. व्यवसायवाढीसाठी प्रयत्न करण्यासाठी चांगला काळ आहे. प्रथम स्थानात शनी असल्याने नकारात्मक विचारांचा प्रभाव राहण्याची शक्यता आहे. त्यावर मात करत पुढे जाण्याची गरज आहे. मात्र, आता साडेसातीचा अखेरचा टप्पा सुरू होणार असल्याने अनेक अडचणी कमी होणार आहेत. तसेच आधी केलेल्या चांगल्या कामांचे फळ मिळण्यास सुरुवात होणार आहे. सर्व चिंता दूर ठेवत होळीच्या सणाचा आनंद घेतल्यास दिवस समाधानात जाणार आहे.
मीन
मीन राशीच्या लोकांना आजचा दिवस सावध राहण्याची गरज आहे. होळीनिमित्त मनावर संयम ठेवल्यास वादविवाद टाळणे शक्य आहे. षष्ठ स्थानात चंद्र असल्याने हितशत्रू कारवाया करण्याची शक्यता आहे. मात्र, त्यावर मात करणे शक्य होणार आहे. प्रथम स्थानात राहू असल्याने मनावरील दडपण दूर करत सकारात्मक विचार ठेवण्याची गरज आहे. आर्थिक दृष्टीनेही आजचा दिवस चांगला जाणार आहे. मात्र, गुंतवणुकीबाबतचे महत्त्वाचे निर्णय पुढे ढकलण्याची गरज आहे. आता लवकरच साडेसातीचा दुसरा टप्पा सुरू होणार असल्याने सावध राहून कोणतेही व्यवहार करण्याची गरज आहे. मात्र, होळीनिमित्त काही चांगेल बेत ठरणार असल्याने मन प्रसन्न राहणार आहे.
