गेल्या महिन्यात कुर्ला येथे झालेल्या अपघातात सात जणांचा मृत्यू झाला. या घटनेप्रकरणी सत्र न्यायालयाने बस चालकाला जामीन नाकारला आहे. जामीन नाकारतानाच ‘बेस्ट बसचा चालक बेपर्वाईने आणि निष्काळजीपणाने गाडी चालवत होता आणि गाडीत काही बिघाड होता हे मानणे कठीण आहे’, असे निरिक्षण सत्र न्यायालयाने नोंदवल्याचे वृत्त एनडीटीव्हीने दिले आहे.
अतिरिक्त सत्र न्यायाधीश व्ही. एम. पठाडे यांनी 10 जानेवारी रोजी आरोपी चालक संजय मोरे (54) यांचा जामीन अर्ज फेटाळला.
मंगळवारी उपलब्ध झालेल्या सविस्तर आदेशानुसार, अपघात बसमधील तांत्रिक/यांत्रिक बिघाडामुळे झाला असा मोरे यांचा युक्तिवाद न्यायालयाने मान्य करण्यास नकार दिला. जरी मोरे यांनी हा अपघात बसच्या खराब देखभालीमुळे किंवा ब्रेक निकामी झाल्यामुळे किंवा यांत्रिक किंवा तांत्रिक दोषामुळे झाला असा दावा केला असला तरी, या युक्तिवादाला प्रथमदर्शनी समर्थन देणारे कोणतेही पुरावे नाहीत, असे न्यायालयाने म्हटले आहे.
आरटीओ (प्रादेशिक परिवहन कार्यालय) ने जारी केलेल्या अहवालात प्रथमदर्शनी बसमध्ये कोणताही यांत्रिक बिघाड नसल्याचे दिसून येते, असे त्यात म्हटले आहे.
या बसमध्ये कोणताही यांत्रिक/तांत्रिक बिघाड किंवा ब्रेक फेल झाला होता ज्यामुळे ही दुर्दैवी दुर्घटना घडली असे मानणे कठीण आहे, असे मत न्यायालयाने नोंदवल्याचे या वृत्तात म्हटले आहे.
चालकाच्या निष्काळजीपणामुळे केवळ बसमधील प्रवाशांचेच नव्हे तर रस्त्यावर असलेल्या प्रवाशांचेही जीव धोक्यात आले, असे निरीक्षण न्यायालयाने नोंदवले आहे.
‘प्रथमदर्शनी असे दिसून आले आहे की अर्जदार आरोपी हा रस्ता वापरत असताना आणि बसमध्ये अनेक प्रवासी होते तरीही तो अतिशय बेफिकीरपणे आणि निष्काळजीपणे बस चालवत होता’, असे आदेशात म्हटले आहे.
‘गुन्ह्याचे गांभीर्य लक्षात घेता आणि आरोपीवर गुन्हा दाखल असलेल्या गुन्ह्यांसाठी देण्यात आलेल्या शिक्षेचा विचार करता, आरोपीला जामिनावर सोडणे मला योग्य वाटत नाही’, असे न्यायाधीशांनी म्हटले आहे.
9 डिसेंबर रोजी बेस्ट उपक्रमाद्वारे चालवण्यात येणारी इलेक्ट्रिक बस कुर्ला रेल्वे स्थानकाजवळील गर्दीच्या रस्त्यावर पादचाऱ्यांना आणि वाहनांना धडकली. या अपघातात सात जणांचा मृत्यू झाला आणि 40 हून अधिक जण जखमी झाले.
त्याच रात्री मोरे यांना अटक करण्यात आली आणि भारतीय न्याय संहिता आणि मोटार वाहन कायद्याच्या संबंधित तरतुदींनुसार त्यांच्यावर गुन्हा दाखल करण्यात आला. जामीन मागताना मोरे यांनी दावा केला की ते एक व्यावसायिक चालक आहेत आणि हा अपघात बसमध्ये अचानक आणि अनपेक्षित यांत्रिक किंवा तांत्रिक बिघाडामुळे झाला. मात्र सरकारी वकिलांनी आरटीओच्या अहवालाचा आधार घेत स्पष्टपणे सांगितले की बसमध्ये कोणताही दोष नव्हता.
